4804/2025-2026

Dated Serchhip, the 12th March, 2026: The Mizoram Bana Kaih (Handholding) Scheme hnuaia CM Special Package dawng tura thlan chhuah progress partner mi 30 te chu vawiin chawhnu khan DC Pisapui Hall-ah Serchhip DC Pu Paul L Khuma kaihhruaiin infuihtharna leh scheme chungchang inhrilhriatna hun hman a ni.

Progress partner kalkhawmte chu theihtawp chhuah turin DC chuan a fuih a. Hnathawhna tur hmanrua sawrkarin CM Special Package hmanga a pek chu a hmanna tur dik taka hmang tur leh an chhungkua theuh sum lak luh tihpun chu an koah a tla a ni tih hre turin a chah a ni. DC Pu Paul L Khuma chuan Mizoram Sawrkar hmalakna Bana Kaih chu India sawrkarin Vikshit Bharat a kalpui mek nen a inhne rem hle, a ti a. Sawrkar Laipuiin kum 2047 ah India ram hi ram changkang (developed country) ah siam a tum a; mi mal tin kum khat thawh chhuah (per capita income) chu a tlem berah cheng nuai 15 tal a nih theih nan tan a la dawn, a ti a. Chu dinhmun thleng thei tur chuan Bana Kaih Scheme hi a tangkai hle dawn a ni, a ti bawk.

Vawiina CM Special Package dawngtu progress partner mi 30 te hi dik leh tangkai taka hmang tura intiamkamna hming ziah tir an ni a. September 2025 a bul tan CM Special Package thawhhnihna kal meka progress partner thlanchhuahte hian an hmalakna (project) an zawh hma chu Mizoram Bana Kaih (Handholding) Scheme hnuaia ham thatna dangte an dil thei rih dawn lo a, a phase zawh hunah erawh an dil leh thei thung ang.

AH &Vety hnuaiah CM Special Package thawhhnihna dawngtu mi 18, Commerce and Industries hnuaiah mi 10, Horticulture leh Fisheries hnuaiah mi pakhat ve ve, an zavaiin mi 30 in an dawng a. Heng progress partner te hian an hmalakna te an tihhlawhtlin theih nan Sawrkar Department-a thawktuten an vil zui dawn bawk a ni.

Vawiin programme-ah hian CM Special Package thawhkhatna dawngtu, mi hlawhtlingte chanchin Success Story, Serchhip DIPR buatsaih chu tihchhuah a ni a. SDC Dr C Vanlalchhanhimi’n Scheme nihphung te a sawi a.  Progress Partner te tan an duhzawng sawina hun leh zawh duh an neih te zawhfiahna hun buatsaihsak an ni bawk.