1195/2024-2025

Dated Serchhip, the 16th July, 2024: Serchhip DC Pu Paul L.Khuma chuan vawiin khan Serchhip District MJA te ko khawmin DC meeting Hall-ah an inkawm a, Serchhip District hmasawnna tura thawhhopuiah DC chuan a sawm a ni.

Bawrhsap Pu Paul L.Khuma chuan District tana a hmathlir sawiin computer leh internet behchhana rang tak leh awlsam zawka inrelbawlna kalpui theihna tur Digital District te; environment humhalh zawnga sawrkar leh mipui inrelbawlna kalpui Green District te; sawrkar department hrang hrang te leh mipui ten District hmasawnna tura thawhhohna - convergence mumal taka an kalpui theih dan tur kawng dap te; kal dan phung pangngai thlak danglama dan hnuaiah vek ngaihtuahna leh thlirna thar nen District hmasawnna hnathawh tul a tih thu te a sawi. DC chuan khua leh tuiten sawrkara an harsatna leh vuivaina an thlen theihna tur leh an chanvo te an zawhfiah theihna tur Mipui Aw (mipuiaw.mizoram.gov.in) hman tangkai thiam a tul, tih a sawi a. Mipui mimirin sawrkar hnathawh kan vil (monitor) theihna tur kawng a buatsaih - Mizoram Right to Public Services Act te chu mipuiin tangkai lehzuala kan hman thiam a ngai, a ti a. Awmze nei zawka sawrkar hnathawk ten hna an thawh theih nan Result framework Document (RFD) te pawh Serchhip District ah hman theih a ni dawn em tih an zirchian mek thu Pu Paul L.Khuma chuan a sawi a ni.

Media mi te chu mipui sukthlek her danglam thei khawpa thiltithei an nih dan sawiin Bawrhsap chuan District hmasawnna atan theihtawp chhuah chhunzawm zel tur leh thawhhona tha tak an neih ngei a beisei thu a sawi a. Journalist te chuan District chhunga mipuiten harsatna an tawh hrang hrang - Cyclone Remal vanga chhiatna thleng te, NH-54 kawng laihin a nghawng chi hrang hrang te, vawk vulhtuten ASF avanga manganna an tawh mek te, ruihhlo do chungchang te leh khawtlang tana thil pawimawh an vei zawng te DC hnenah hian an thlen nghal a ni.

DC Pu Paul L.Khuma chuan National Highway 54 chungchanga complain lut te a hmun ngeiah official ten an endik a, an hmuhdan report te ngaihthlak leh sawiho a ni tawh tih Journalist te hi a hrilh a. NHIDCL hnuaia contractor te kokhawmin kawng laih vanga harsatna thleng chi hrang hrang te chinfel dan an ngaihtuahho dawn tih a sawi a ni.

Vawiin meeting-ah hian hian MJA Serchhip District member te chu an President Pu C.Lalhminghlua hovin an tel a. SDO (Sadar) Pi Rebecca Laldinmawiin Hrahsel, Settlement Officer Pu Gaston Vanlalhriatpuia leh DIPRO Pi Lalnunmawii te meeting-ah hian an tel a ni.