No.958/2021-2022 

Dated Serchhip, the 14th June, 2021: Vawiin hian Serchhip District Disaster management Committee member te leh Serchhip khawpui chhunga Covid19 Lockdown kenkawh kawnga hnathawktu pawimawh hrang hrang sawm bikte chuan tun hapta kal meka Lockdown inkaihhruaina kalpui dan tur thlir hona DC Meeting hall ah an nei a, State Order in a phal china Serchhipa hman tur bik dan thenkhat an siam.


Chairman Pu Kumar Abhishek, IAS, Bawrhsap chuan Covid19 hripui leng mek lakah Serchhip khawpuiah hun engemaw chen hri kai hmuh a ni tawh lo chu VLTF leh dan kengkawhtu hrang hrangte, mipuite thuawih tlatna vangte a ni tih sawiin lawmthu a sawi a. Mitin tuna dan dinglaite tha taka zawma, Covid19 laka himna dan (Appropriate behavior) te tha taka zawm chhunzawm zel turin a ngen a ni.  High Court thupek ding sa leh State Executive Order thuchhuak angin khawi khua emaw veng bil mahin mahni thua State Order pela dan lo zam bik a remchan loh thu sawiin, tuna sawrkar inkaihhruaina dan siam sa te chu tha taka kan zawm chuan a him tawk a ni, a ti a. Chutianga kan kal chunga hri kai tharte kan lo la awm zel a nih chuan a umzui dan tur pawh sawrkarin ruahmanna fel tak a nei sa a, sawrkar ruahmanna hi i ring tawk ang u, tiin kal khawmte a chah a ni.


Vawiina meeting hian, Serchhip chu tun thlenga boruak tha tak neia a kal theih zel rih avangin, dawr neia eizawngtu, hun rei tak inhawng tawh lote tana an dawr hawn hun tam deuh zawk ruahman sak tha a ti a. Eichawp dawr neitute chu nitin zing dar 5:00 am atanga dar 10:00 am thlenga inhawn remtih sak an rel a, Restaurant leh eitur zawrhna dawrte pawh Home Delivery tura an inhawn hun ruahman sak tha an ti bawk. Tin, bungrua loading leh unloading hun pawh tlai dawr khar hnu atanga an thawh theih dan tur duan tha an ti bawk a. Dawr dang zawng zawngte pawh an inhawn theih ni te tihbelh deuh an rel bawk a ni. 


Heng dawr inhawn hun siam belh leh vawiina sawiho te hi a kalpui dan tur mumal tak Deputy Commissioner chuan a hranin a rawn tichhuak leh dawn a ni.


Vawiin meeting ah hian DDMA member te bakah VLTF aiawhte, tlawmngaipawl aiawhte leh Medical lam aiawhte an tel a ni.

Attachment

  • Loading attachment...