45/2024-2025 

Dated Serchhip, the 4^th April, 2024: Serchhip Bawrhsap Pu David Lalthantluanga, District Election Officer chuan vawiin khan DC Meeting Hall, Serchhip ah Lok Sabha 2024 inthlanpui atana inbuatsaihna meeting pawimawh tak a ko a. Serchhip SP Pu MS Dawngkima leh official pawimawhte an tel a ni.

DC Pu David Lalthantluanga chuan Poll Day kan hnaih tial tial a, inbuatsaihna pawhin a vawr tawp a thleng mek tiin inthlanna felfai leh thianghlim kan neih theihna tura mawhphurtu zawng zawng te theihtawp chhuah turin a sawm a. Election inbuatsaihna chungchangah a mawhphurtute a huhoa inkohkhawm hnuhnung a nih tawh dawn avangin tul leh pawimawh zawng zawng kim chang taka sawi turin member te a chah a ni.

SP Pu MS Dawngkima pawhin Lok Sabha Inthlanpui inbuatsaihnaa venhimna kaihhnawih chungchang sawiin inbuatsaihna a zo thawkhat tawh niin a sawi a. District pawn leh State pawn atanga venhimna hnathawk tur Security Force te dawnsawn dan chungchangah Department dang, a bik takin P&E leh PHE te tawiawmna a pawimawh thu a sawi a. Sector Officer leh Sector Police te thawhhona a tha a, venhimna chungchangah tun thlengin harsatna a awm loh thu a sawi a ni.

Serchhip District hi Sector sawmpali ah then niin a viltu tur Sector Officer leh Sector Police pakhat theuh ruat an ni a. Anni hian an bial theuh te fang chhuakin venhimna leh Assured Minimum Facility dinhmun an enfiah a. Heng an enfiahna atang hian Polling Station thenkhat tui leh eng supply tha tawk lo te, furniture mamawh la nei kim lo te, wheelchair nawrna tur ramp la nei lo te leh thil fello thenkhat an hmuh te meeting ah hian an report a. A chinfel dan tur sawiho nghal niin Poll Day hmaa inpeihfel vek tura hriattir an ni a. Tun dinhmunah Serchhip District Polling Station tam zawk chu an inbuatsaih fel tawh a. Thawm that ngai tlem la awm te pawh Poll Day hmaa peihfel hman tura beisei an ni. Khua rel chhiatna, hriat lawk theih loh, thleng thei reng a nih avangin bialtu Sector Officer te chu an bial theuhah harsatna a awm leh awm loh ngaihven reng turin DC Pu David Lalthantluanga chuan a chah a ni.

District Election Office a inbiakpawhna hmunpui chungchang pawh sawiho a ni a. Vote thlak ni atan DC office ah Communication Control Room leh Webcasting Control Room te dah a ni dawn a. Media Monitoring Control Room hi DIPRO Office, DC Office Complex-ah dah a ni ang. Mobile phone signal awm loh thulhah leh tul dang atan MPRO te an duty dawn bawk a ni.