No.6498/2020-2021

Dated Serchhip, the 11th November, 2020:    Vawiin hian Serchhip DIstrict Level Committee on Sansaad Adharsh Gram Yojana (SAGY) te chu  DC meeting hall ah an Chairman Pu Kumar Abhishek, IAS, DC hovin an thukhawm a, district chhunga MP Model Village leh MLA model village tea hmalak dan tur an thlir ho.

Pu Kumar Abhishek chuan, tun dinhmunah MP model village Khumtung, MLA Tuikum model Village Khawbel leh MLA Serchhip model village Neihloh te bakah Aizawl North II model village Hmawngkawn te chu district chhunga model village atana thlan awm mek an nih thu a sawi a. MLA Hrangturzo model village pawh reiloteah hriat thuai beisei a nih thu a tarlang bawk. Bawrhsap chuan heng model villageah te hian a hranpaa hmasawnna hnathawhna tur sum kal bik awm chuang lova sawrkar hmalakna kal lai leh ruahmanna awm mek te entawn tlak taka thawhna tur atana thlan an ni, a ti a. Heng model village atana thlanah te hian engkim tha zawka kan kalpui theih nan tuna an dinhmun leh mipuite mamawh dik tak kan hriatchian a ngai a, survey uluk taka neih hmasak a tul thu a tarlang bawk.

Pu Malsawmtluanga, MCS, PD Serchhip, Member Secretary SAGY Committee chuan an hmalak tawhna chin leh hriat tur tul awm te sawifiahna a nei a. MP Model Village, Khumtung hi SAGY 5th Phase a kalpui tan tura tih a ni a, chu chu kum 2022-2024 inkar a nih thusawiin, tunah hian lo inhmakhua nan hmalakna bul tan a nih thu a sawi a. MLA te thlan model Village (VAGY) te erawh chu hmalakna kalpui nghal mai theih a ni a ti. Hmalak dan tur Plan te chu GPDP Plan mila dahin line department te nena khaw tinte mamawh hriatchian hmasak chu hna hmasa a nih thu a sawi bawk.

Vawiia meeting hian heng Model village tea line department te hmalak dan tur ruahmanna leh hmalak mek awmte chipchiar taka thehluh ran ni se, model village ah te survey team, line department aiawhte telna tirh thuaia Action Plan rintlak tak a rang lama neih nise tiin an rel a ni.

Meeting ah hian Pu Lalmuansanga Ralte, Addl DC leh member dangte an tel a ni.