August 6, 2012 a NLUP Apex Board Meeting thutlukna bawhzuiin vawiin chawhma khan Serchhip District Bawrhsap leh District Level NLUP Implementing Committee Chairman ni bawk Pu P. Lalchhuanga chuan Pu Biaklawma Serchhip-II NLUP lak chhunzawmna tur order a chhuah ta.

Pu Biaklawma hi NLUP First Phase dawng tura thlan, Mandarin Orange Trade thlangtu a ni a, First Installment pawh a dawng hman tawh a, nimahsela a fapa-in sawrkarah hna nghet a lo hmuh leh tak si avangin sawrkarah NLUP dawng thei an nih tawh lo thu thehlutin a inhnukdawk a. He a thiltih ropui tak hi NLUP committee sang ber chuan ropui leh zahawm a tih avangin NLUP chu a thara dawng chhunzawm leh turin a ti ta a ni.

Hemi chungchangah hian State leh District Level-a mawhphurhna latu Joint Director, Directorate of Horticulture, Mizoram, Aizawl leh Divisional Horticulture Officer, Serchhip District, Serchhip te chu tih tur tul te lo tifel tur leh an hmalakna chu August 28, 2012 hma ngeia ziaka Chairman, District Level NLUP Implementing Committee hnena theh lut turin a hriattir nghal bawk.