770/2024-2025

Dated Serchhip, the 12th June, 2024: Serchhip District chhunga khaw 11 - Bawktlang, Piler, Hmuntha, Buangpui, Zote South, Sialhau, Khawbel, Neihloh, Thinglian,Vanchengte leh Hmunzawl te chu TB Free Village-a puan an ni a. Vawiin chawhma khan a lawmna hun Serchhip DC Conference Hall ah buatsaih niin Serchhip DC leh District TB Committee Chairman ni bawk Pu David Lalthantluanga, IAS chu khuallian a ni.

Serchhip District chhunga khaw 11 lai TB Free Village a puan an ni leh sawrkar laipui atanga lawmman dawng tura thlan an ni chu DC Pu David Lalthantluanga chuan a lawmpui takzet thu a sawi a. Serchhip District chu TB dona kawngah hma an la tha a, sawrkar laipuiin target a chhawpchhuah te an tlin a, khawtlang mipuite leh Health Department hotute thawhhona thatzia a lang a ni, a ti. Hmalak hmasakna khaw 11 te an hlawhtlin ang bawkin District chhung khaw dangah beihpui thlak a ni zel dawn a, TB awmlohna District kan nih ngei theihna turin khaw tin te tan la turin DC chuan a fuih a. Vawiina Bronze medal dawngtu khaw 11 te pawh silver leh gold medal dawng ngei thei tura tan la turin a fuih a ni.

Pu David Lalthantluanga chuan Serchhip District a awm chhunga sawrkar hmalakna thenkhat te vawiin programme ah hian a tarlang a. Vanchengte khua chu District Headquarters awlsam zawka an tlawhpawh theih nan Kikawna chhuak mai thei turin Tuikum kanna lei (bridge) dawh tum a nih thu leh, he ruahmanna hi DM&R lamin an pawmsak thu a sawi a. Khaw kar kawng, fura lirthei kal hleihtheih lohna kawngpui thenkhat te pawh all weather road a siam tuma hmalak mek a nih dan te DC chuan a sawi a ni.

Sr.CMO Dr LP Malsawma pawhin thusawiin Mizoram thalai te zingah ruihhlo a hluar em em a, Serchhip District pawh min run mek a, HIV/AIDS vei te hi rin phak bakin an tam, tih a sawi a. Heng mi te zingah TB case a hluar hle a, HIV hrik pai lo te zingah pawh taksa chak lo deuh leh natna dona nei tha lo te zingah TB hrik kai a awlsam bik, a ti a. Ruihhlo leh HIV/AIDS dona kawngah tan lak a tulzia Sr.CMO chuan a sawi a ni.

Vawiin programme hi District TB Officer Dr Lalnunhlima Khiangte chuan a kaihruai a. TB dona kawnga Serchhip dinhmun tlangpui sawiin 2022-2023 chhung khan Serchhipah TB vei mi 53 hmuhchhuah an ni a, May 10, 2024 thleng khan TB vei mi 22 hmuhchhuah an ni. TB damdawi ei hunbi a ei lo leh ei kim duh lo ten TB ngawl vei drug resistant tuberculosis natna vei a hlauhawmzia sawiin District TB Officer chuan TB vei an awm a nih chuan, damdawi course tha taka la turin a chah a. TB ngawl vei tawh te laka TB hri kai leh chhawng te pawhin a natna hlauhawm chi hi an kai thin tih hria a, fimkhur turin a ngen a. Serchhipah kum 2023 chhungin Programmatic Management of Drug-resistant Tuberculosis case 3 an nei, tih a sawi.

TB Mukht Gram Panchayat Bronze medal dawngtu khaw 11- Bawktlang, Piler, Hmuntha, Buangpui, Zote South, Sialhau, Khawbel, Neihloh, Thinglian,Vanchengte leh Hmunzawl te aiawh Village Council member-te hnenah DC leh Sr.CMO ten medal hi an hlan a ni.