Nimin Dt 17.8.2016 khan Serchhip District Assistant Settlement Officer Pu Lalremruata Sialo, MCS chuan District chhung khawtina Village Council leh mipuite hriat tur in hmun lo ram in pek dan hriattirna a ti chhuak a. Khawtin thuneitute leh mipuite chu sawrkar dan ang zela engkim kalpui thin turin a ngen bawk.

Thuchhuahin a tarlan dan chuan; Town/Sub Town/ Notified Area a puan tawh ram chhungah reng reng Village Council ten anmahni thuin in hmun an pe thei lova, an hnena in hmun diltute dilna chu sawrkar ruahmanna anga din Site Advisory Allotment Board kal tlang leh an remtihna nen chauhva pek theih an ni. Tin heng Town/Sub Town/ Notified Area khua, Site Advisory Allotment Board (SAAB) la din lohna khua te chuan a hma thei ang bera SAAB hi din tura hriattir an ni.

Heng a chunga kan sawi khua nilo ah chuan Village Council ten anmahni khaw huam chhung chinah in hmun atan a zau berah 1 Bigha emaw 1337.8 Sqm emaw 14400 Sqft leh 111.5 Sqmtr emaw 1200 Sqft aia zima pek loh tur a ni. Tin, an pek dan kim chang chu Village Council Record Book ah fel taka chhinchhiah tur a ni a, heng thilte hi tihlan tur a ni ang. Pass Number leh kum, ram peka hming leh address kimchang, Pa hming, a hmun, ramri sawifiahna chiang tak leh a zau zawng dik tak te. Tin, an ram pek chu vantlang hmunhma leh vantlang tana hnawk sak thei turah emaw mipui hriselna leh remchanna leh himna tibuai thei turah emaw sawrkar ram leh sawrkar thil ruahmanna huam chhungah reng reng chuan in hmun (House site) hi pek loh tur a ni ang.

In hmun atan nilo, thil dang atan chuan sawrkar phalna lovin Village Council te hian ram an pe thei lova, he thuthlung namnula a ram pek reng reng chu engmahlo a ni.

Hriattirna hi District chhunga Village Council zawng zawngah pek an ni a, hrechiang leh zual duh tan Assistant Settlement Office, Serchhip District ah zawhfiah theih ani ang.