769/2026-2027

Dated Serchhip, the 29th May 2026: Serchhip District Consumer Association-te chuan vawiin khan Bharti Gas supply hmuh tur a awm tak loh avanga consumer-te harsatna tawh mek chungchang chu Serchhip District Magistrate hnenah an thlen a. Hemi chungchang hi DC chamber-ah sawi ho niin Bharti Gas aiawh leh District Consumer Association lam atangin Secretary te an tel a ni.

Bharti Gas hian a tirah supply tha tak nei thin mah se, tunah erawh gas pek tur an neih tawh loh avangin consumerte’n harsatna an tawk mek a. Vawiin meeting-ah hian Consumer Association-te rawtna anga consumer-te’n an gas cylinder-te pek let a, an lo insenral tawhnate pek let ni se tih chu Serchhip Bharti Gas dealer-te chinfel theih piahlam thil a nih avang leh Court case kallai anih avangin Court thutlukna ngaihchan ni se tia rel a ni a. Bharti gas agency-te chuan karleh June ni 6 chhungin an consumer list-te an submit ang a, Bharti Gas consumer-te chuan July thla chhungin, Bharti gas ten  collection centre an siamah, an cylinder-te, consumer card telin submit ni se tia rel ni bawkin; Bharti gas cylinder leh Indane /mizofed cylinder nena lo thleng kual tawhte pawh felfai taka chhinchiah ni se tia rel a ni bawk.

Vawiin meeting-ah hian gas supply ti chingpen leh dan bawhchhetute chu LPG (Regulation and Distribution) Order, 2000 leh Section 7 of Essential Commodities Act (ECA), 1955 tlawhchhanin hremna theih an nih thu sawilan a ni bawk.

Bharti Gas hi Guwahati based niin, April 2020 khan Serchhipah an inbun a, consumer 395 an awm. Mizoram chhungah dealer 9 awmin hun eng emaw chen kalta atang khan supply an hmuh tak loh avangin dealers-te hian harsatna an tawk mek a,  lungawilohna lanttirin Court-ah thubuai an thehlut a, court case a kal mek a ni.