No.3419/2021-2022

Dated Aizawl, the 15th November, 2021:  Vawiin khan DC Conference Hall, Serchhip ah District Consumer Meet leh Minister's Award 2021 lawmna hun hman a ni a, Pu Zothanmawia, MCS, Secretary, Food, Civil Supply & Consumer Affairs Department chuan khuallian niin a hmanpui.

Khuallian chuan, kan dikna chanvo humhim tura mahnia kan tih ngam lohte hi Consumer Association hminga hmalak a rem thin a, pawl hming a nih chuan hmalak a nuamin a lo awlsam zawk thin a ni, tiin Consusmer Association a ding chu lawmawm a tih thu a sawi a. FCS&CA Department chu Consumerte hmakhua, an chetvelna chungchang ngaihtuahtu a ni a, an hamthatna leh hmakhua a ngaihtuah reng thin a ni. Consumerte pawhin kan chanvo kan hriat a, tun aia fimkhur nachang kan hriat deuh deuh a tul a, kan thil lei tawh thleng let a tul changin kan lei ngei ani tih chianna tur chu cash memo ani a consumer ten kan hmanrua ve a ni tih hria in ngaihpawimawh nachang kan hriat a tul a ni, a ti. Mi huat pawh hlau lova Consumer Asociation mumal tak ding chuan Consumer te tan hmasawnna nasa taka a thlen tawh thu a sawiin, Serchhip District Consumer Association pawhin nasa taka hma lain an thawh that em avanga Minister’s Proficiency Award 2021 an dawng hial a, an phu hle a ni tiin an lawmman lak a lawmpui thu a sawi a ni.

Khualzahawm, Pi Ramdinliani, MCS, Director, Food, Civil Supply & Consumer Affairs Department pawhin thusawiin Serchhip District Consumer Asociation te hnathawh leh hmalakna  chu fakawm a tih thu a sawi a, district danga an tih ngai loh consumer te thlavang hauhna Serchhipah a thleng fo thin a midangin an entawn mek a ni a ti. Consumer ten an chanvo an chang lo anih chuan thuneitute hnenah thlen nachang hriat tur a ni a, chumi hre tur chuan kan dikna leh kan chanvo kan hrechiang tur a ni. Kan dikna chanvo kan chan theuh theih nana langtlang zawka hmalak anih theihna tura sawrkar ruahmanna te dodaltu ni lo turin kalkhawmte a chah bawk a ni.

He hun hi Pu H. Zonuntluanga, President, Serchhip District Consumer Association chuan kaihhruaiin, Pu Laldinpuia, Secretary, SDCA chuan District Consumer Association hmalakna hrang hrangte leh hmachhawp mekte report a pek bakah Mizorama  Consumer Association hnatawk tha ber chawimawina Hon’ble Minister Pu C. Lalrinsanga'n kumin March Ni 13 a  Minister's Award 2021 alo hlan chungchangte ngaihthlak a ni.

He hunah hian Pu Kumar Abhishek, IAS, Deputy Commissioner, Serchhip District, Pi F. Lalnisai, MCS, SDC Serchhip bakah District chhung khaw hrang hranga Consumer Association aiawhte telin, Consumer kaihhnawih zawhna leh chhanna hun hman ho a ni bawk.