Vawiin hian Serchhip DC Conference Hall ah Serchhip District Development Co-ordination and Monitoring Committee (DDCMC), DISHA tia sawi bawk chu an Chairman Pu CL Ruala, MP Lok Sabha leh Co-Chairman Pu Ronald Sapa Tlau, MP Rajya Sabha hovin an thukhawm a. Nikum October – December 2016 chhunga District chhunga hmalakna hrang hrang an thlir ho bakah Meeting hmasaa rorelte umzui dan an en ho.

Chairman Pu CL Ruala chuan, tun tum meeting ah hian State Budget hriat chian a la nih loh deuh avangin hmalak dan siam fel a har deuh dawn a, April thlaa meeting hunah engkim chiang zawkin kan siam theih zawk a rinawm tih a sawi a. Chutih laiin District Officer te chu hnathawh tha, mipuite tan tangkai ngei  tur duan chhuah tum turin a fuih a ni. Co-Chairman Pu Ronald Sapa Tlau pawhin thusawiin District Officer te chu Serchhip District tihmasawn turin an ni bak an awm chuang lo tih hre tur leh an thawh chhunga hriatreng tlak thil tha tih ngei tum turin a fuih a. Tlawmngaipawlten DDCMC Meeting an ngai pawimawh hle thin chu a lawm thu leh Serchhip District chhunga sawrkar leh tlawmngaipawl thawh hona thatzia lan chianna pakhat nia a hriat thu a sawi.

Vawiina meetingah hian hmasawnna hnathawh hrang hrang tarlan a ni a, PMGSY hnuaiah khaw kar kawng inkalpawhna Chhingchhip to Thentlang Road, Hmuntha to Khawbel Road, Chhingchhip to Hualtu Road, Chhingchhip to Hmuntha Road leh E. Lungdar to Sailulak Road te sial mek a ni a. Tin, Serchhip to Hriangtlang inkar kawng pawh tunah DPR thehluh mek a ni. RGGVY, tun hnua DDUGJY tia hming thlak takah Serchhip Division hnuaiah khaw 18 zinga khaw 14 zawh fel vek tawh a ni a, a dang khaw 4 te pawh Distribution Transformer  dah fela zawh theihin a awm mek a. Tun thla chhung hian zawh hman a nih beisei a ni. Maicham Division hnuaiah khaw 9 zawj tawh a ni a, khaw 2 ah Distribution Transformaer tihfel hmabak a la awm a, zawh thuai tum a ni.

National Rural Drinking Water Programme hnuaiah Khawlailung leh Khawbel Tuilak thawh a ni a, Khawbel hi zawh fel tawh niin Khawlailung pawh chak taka thawh mek a ni a, Project dang pawh thehluh leh niin approval nghah mek a ni. Swachh Bharat Missions (Gramin/ Rural) hnuaiah Individual Household Latrine (IHHL) zawng zawngte Sanitised Latrine vek tura tih a nih leh tak si avangin ruahmanna siamthat hlek a ni a. District chhunga IHHL mamawh chhungkaw 1346 tan tunah sum dil mek a ni a, hei hi tihfel a nih veleh Open Defecation Free District–a puan mai theih a ni dawn a ni.

National Social Assistance Programme hnuaiah District chhungah Old Age Pension dawng mi 1571 an awm mek a, Widow Pension la 164 leh Disabled Pensiaon dawng mi 47 an awm mek bawk.

National health Missions hnuaiah hmalakna engemawzat kalpui mek a ni a, October-December, 2016 inkarah District chhungah nausen boral 7 an awm a, naupiang zawng zawng 258 atang chhutin IMR hi 27.1% a ni. Nu nau chunga boral hi 2016 chhungin an awm lo thung. He mi hun chhunga Raipuar in-register hi mi 256 an awm a ni. October-December, 2016 chhung hian naupang vaccine la mi 283 an awm a, naupai vaccine la mi 235 an awm bawk.

Ni za inhlawhna atangin kum 2016 December thla thleng khan ni 17  inhlawhna siam hman a ni a. January thla chhungin ni 6 thawh leh a ni bawka, avaiin ni 23 thawh hman a ni. Kum thar atangin ni za inhlawhna hlawh hi VC kaltlang tawh lovin a thawktute bank Account ah thun vek tawh tur a ni. Tin, mirethei in sak tanpuina IAY  atangin December 2016 thleng khan mi 41 hnenah tanpuina pek a ni a. Kum thar atang chuan he Scheme hi PMAY (Housing for All) Scheme kalpui a nih tawh dawn avangin IAY hi a tawp tawh dawn a ni. National Rural Livelihood Missions hnuaiah December, 2016 thleng khan Self-Help Group 416siamtawh a ni a, hmasawnna tam tak hmuh zui theihin a awm mek a ni.

Border Area Development Programme (BADP) sum hmangin tunah hian E. Lungdar Block hnuaia khaw hrang hrangah hna chi hrang hrang 23 thawh mek a ni a. Kumin chhunga BADP sum hmuh hi Rs 165.72 Lakh a ni.

Hengte bakah hian District chhunga hmasawnna hnathawh dang engemaw zat en ho a ni bawk.

He meeting ah hian Bawrsap Dr. Lalrozama, IAS leh Pu VL Remliana, Project Director, DRDA te bakah District Officers hote, tlawmngaipawl aiawhte, Village Council aiawhte an tel a ni.