Vawiin hian Serchhip DC Conference Hall ah Serchhip District chhunga Central sawrkar sum hmanga hmasawnna hnathawh hrang hrangte enzuitu Committee; District Development Co-ordination & Monitoring Committee (DDCMC/DISHA) chu an Chairman Pu C.L Ruala, M.P Lok Sabha hovin an thukhawm a.  Member Pi Vanlalawmpuii Chawngthu, MLA, 28- Hrangturzo, Minister of State ni bawk te,  Er. Lalrinawma, MLA 27- Tuikum leh Member Secretary Pi Sangchhin Chinzah, DC Serchhip leh Member dang te an tel.

Chairman Pu C. L Ruala chuan DISHA member te chu kum thar chibai bukin, thinlung thar nena nasa zawka mipui tana hnathawk tura insiamthar tura fuihin, member te chu sawrkar kutke pawimawh; ramin hma a sawn theih nana a fawng chelhtu an nih zia hre turin a ngen a. Co-ordination Committee a nih ang ngeiin Department hrang hrang ten inpawhna tha tak nei chunga ram mipuite rawng an bawl hova, an tanrual theih nan he meeting hi a pawimawh em em ani, a ti.

He meetingah hian Pu VL. Remliana, Project Director, DRDA kaihhruaiin Department hrang hrangten tun hnaia an hnathawh dan report an pe a. Report hrang hrangte chu a tul angin sawi zuia hmalak chhunzawm dan tur ruahman nghal zel an ni.

Report tlangpui chu; PMGSY sum hmanga PWD Department ten District chhunga inkalpawhna kawng an thawh mek panga (5) Chhingchhip to Thentlang, Hmuntha to Khawbel, Chhingchhip to Hualtu, Chhingchhip to Hmuntha leh E. Lungdar to Sailulak te chu tun financial year chhunga thawh zawh vek hman tura beisei an ni a. Tuichang lei (Bridge) pawh tunah hian a thara dawh hna thawh mek niin kumin chhung hian khuain a zir chuan hna chanve (zatve) thawh zawh hman beisei a ni. Hetih mek lai hian tuna a awmsa thuam thatna tur pawh proposal Rs. 16 Lakh senna tur thehluh fel a ni tawh bawk.

National Rural Drinking Water Programme hnuaiah PHE Department ten tunah hian Lungkawlh WSS, Tuichang WSS leh Neihloh Rainwater Harvesting Scheme te an kalpui mek a. Lungkawlh bik hi hna tan theih tura hmanruate phurh thlen tawh niin, Tuichangah tui a haw thei tawh a, Neihloh pawh chak taka thawh mek a ni. Heng bakah hian PHE hmalakna hnuaiah sawrkar kum tharah hnathar engemawzat neih belh beisei a ni.

National Social Assistance Programme kaltlangin Serchhip leh E. Lungdar ICDS Project hnuaiah Tar Pension mi 918, hmeithai pension mi 84 leh Disabled Pension mi 24 ten an dawng mek a. National Family Benefits Scheme hnuaiah tun hnaiah chhungkaw 6 tanpuina pek an ni bawk. National Family Benefits Scheme hi kum 2017-18 ah mi 12 pek tura ruahmanna siam a ni.

National Health Missions hmalaknaah April, 2017 leh January, 2018 inkarah District chhungah naupiang mi 882 an awm a, heng zingah hian boral 12 awmin Infant Mortality Rate chu 13.6 a ni. Nu nau chunga boral an awm lo thung.  An zinga a thlawna Damdawiina nau nei (JSSK) hi mi 551 an ni a, JSY tanpuina (nau neih tanpuina) dawng mi 805 an awm bawk a ni. Mizoramah hian Vector Born Disease hi chi hnih Malaria leh Dengue control programme kalpui a ni a. Serchhip District ah khi mi hun chhung vekah khian thisen exam 10743 neih  a ni a, Dengue vei an awm lova, Malaria erawh chu case 8 hmuh niin an zinga pahnih chu vanduai thlak takin an boral a, pakhat zawk hi Haryana lam mi, Serchhip District chhunga hnathawka awm a ni. He mi hun chhung vek hian High Risk Population zingah mi 2536 te chu HIV test niin an zinga 24 ten an vei tih hmuhchhuah a ni a, ANC atanga test ah mi 5 hmuhchhuah an ni bawk. HIV positive level hi 1% a nihin mipui zingah HIV a darh nasa hle tawh niah WHO chuan a ngai thin a. Serchhip District dinhmun hi tunah 0.40% a ni mek a ni. DISHA Chairman Pu C.L Ruala chuan, HIV hi kan ramah a darh chak em em mai a, YMA leh tlawmngaipawl hrang hrangten nasa zawka HIV laka kan himna tur kawngah hma la nasa deuh deuh se a duh thu a sawi nghe nghe a ni.

Rural Development lamin ni za inhlawhna an kalpuiah tun Financial Year chhungin ni 48 inhlawhna an siam tawh a, mirethei insakna chhungkaw 65 hnenah pe tawhin an zinga 40 chu sak zawh tawh a ni a, a dangte hi la thawh mek an ni. IWMDP/PMKSY hmalakna pawh chak taka kalpui mek niin National Monitoring Team te chuan IWMP Project I chhunga Estheri SHG leh Project II chhunga Buangpui Handloom SHG te hmalakna an fak hle a. Tin, Missions Antyodaya kalpui mekah Leng khua chu Mizorama Thingtlang khawfai berah thlangin, Piler chu top ten ah a lang bawk a. E. Lungdar BDO chu Best Block ah thlan niin Serchhip PD pawh Best PD ah thlan a ni a. SARAS Fair, 2017 ah N. Vanlaiphaia IWMP hnuaia 7 Star SHG te chu Best SHG ah thlan an ni bawk.

Hengte bakah hian District chhunga Central sum hmanga hmalakna pawimawh chi hrang hrang engemawzat vawiina DDCMC/DISHA meeting ah hian ngaihtuah ho a ni bawk.