No.6728/2020-2021

Dated Serchhip, the 1st December, 2020:     Vawiin hian Serchhip DC Meeting Hall ah Serchhip District Development Co-ordination and Monitoring Committee chu an Chairman Pu C. Lalrosanga, MP LS leh Co- Chairman Pu K. Vanlalvena, MP, LS leh Er. Lalrinawma, Dy. Speaker te nen an thukhawm a. District chhunga Central sawrkar sum hmanga hmasawnna hnathawh hrang hrangte an thlir ho.

Chairman Pu C. Lalrosanga chuan, hripui vangin hun engemaw chen kan thukhawm thei tawh lova, khang hun chhunga report tur awm apiangte sawi telin vawiinah thutkhawm theihna hun kan nei hi a lawmawm hle a.  Co- Chairman Pu K. Vanlalvena leh Tuikum bialtu MLA Er. Lalrinawma ten an telpui theih avanga lawmthu sawiin, members kal zawng zawngte hnenah lawmthu a sawi a ni. 

Co Chairman Pu K. Vanlalvena pawhin thusawiin, sawrkarna inthlakin, roreltu party chu lo danglam thin mahse engtiklai pawha ram tana dinhmun pawimawh chelh tlat reng tute chu sawrkar hnathawkte in ni a. In thahnemngaihna hian ram a chawikang zel thin a ni, a ti a. Ram tana theihtawp chhuah zel turin a chah a ni. Pu K. Vanlalvena chuan Central lama bawhzui chi Project inneihte chu inthlahrung lovin min hriattir zel ula, kan theihna zawn zawnah kan lo umzui anga, ram tan tha thlah lovin kan thawkho zel dawn nia, tiin members kalte a chah a ni.

Pu Malsawmtluanga, Project Director, DRDA & Charge Officer, DISHA kaihhruainain member Department hrang hrangten tun sawrkar kum kal meka Central Scheme an thawh hrang hrangte report an pe a. Members ten zawhna an neih leh hmalak zui zel nana thil pawimawh nia an hriatten an sawi ho zui a ni. Tun sawrkar kum kal mekah MGNREGA atangin ni 82 inhlawh tawh a ni a, ni 100 inhlawhna a awm ngei tura beisei a ni. Thingtlang mirethei insak tanpuina, PMAY (G) hi 2016 atangin vawiin thlengin Serchhip District ah mi 100 pek an ni tawh a. An zinga 88 chuan sa zovin an liah tawh a, a dang 12 te pawh sak zawh tawh engemaw han tihfel hlek la ngai mai te an ni tawh a ni. National Rural Livelihood Missions hnuaiah tun hnaiah Lungchhuanah Hmarcha sawngbawlna bun thar a ni a, Leng ah Aieng herna dah niin Hmuntha, Khawbel leh Hualtuah Alu chin tum mek a ni. District chhungah PMGSY sumin khaw karkawng 10 thawh mek a ni a, heng zinga a tam zawk hi thawh zawh thawkhat tawh an ni. Thingtlang khuate tana tuilak hnathawhna, Jal Jeevan Mission hnuaiah 2019-20 financial year ah khaw 16 tan tuilak hnathawh a ni a, an zinga 10 hi zawh tawh niin a dang te pawh zawh thuai beisei a ni a, kum 2020-21 ah hian khaw dang 7 ah hetiang hmalakna bawk hi thawh zui nghal tur a ni. Swach Bharat Rural lama hmalaknaah Serchhip chu India ram puma district titha 10 thlan chhuah zingah a tel a, tunah hian chung zinga a titha zual result chu nghah mek a ni. Tin, 2019 khan Swachh Survekshan ah India ram state te (small state) leh UT category ah pahnihna an dawng bawk a. World Toilet Day Award, 2020 lawmman dawng tura thlan an ni bawk.  Kumin kal mekah naupiang 220 chhinchhiah tawh an ni a, an zinga 2 hi an boral a, naupang kum 5 hnuai lam boral 2 an awm bawk a, kum laihawla chhinchhiah danin district chhungah naupang kum 5 hnuailam hi 5978 an awm mek a. Tichuan, Infant Mortality Rate chu 9 a ni. Immunization achieve rate hi 88.09% niin Champhai district dawta awmin a titha pahnihna an ni mek bawk.

Hengte bakah hian District chhunga hmasawnna hnathawh hrang hrang, Swachh Bharat Urban Missions te, National Urban Livelihood Missions te, ICDS, PMMVY, Poshan Abhiyaan, Samagra Shiksha, National Food Security Acts, te leh thil danga hmalakna te pawh an sawi a ni.

Member Secretary Pu Kumar Abhishek, DC, Serchhip chuan lawmthu sawiin, DISHA chu district committee pawimawh tak, hmasawnna hnathawktu department hrang hrangte inpawhtlang taka kan thawh ho theih nana kan inhriatpawhna leh kan district chhunga elected representative te nena kan inpawh tlanna hmun tha a nih thu a sawi a. Member kal zawng zawngte chungah lawmthu sawiin committee a titawp a ni.