Vawiin hian Serchhip District Disaster Management Authority (DDMA) chuan sawm bik Department Officer te nen DC Office ah kumin December thlaa Mega Mock Drill, National Disaster Management Authority ruahmanna hnuaia Serchhip khawpui chhunga neih dan tur an rel.

Serchhip DDMA Chairman Dr. Lalrozama, IAS chuan chhiatna te hi kan duh emaw duh lo emaw leilungah a lo thleng thin a, khawvel History ah khuarel chhiatna hian hmun pawimawh tak a lo luah fo tawh thin a ni. A lo thlen dan turte, a lo thlen hun te, a lo dawnsawn dan tur te chu hriain thiam sa thei lo mah ila a lo thlen palha engemaw chen a dawnsawn dan tur kan thiam theih nan Exercise lo neih fo hi a pawimawh em em a ni, a ti a. Ram changkang leh hmasawn zawkte pawhin theih ang tawka lo inbuatsaih lawk hi an uarin an ngai pawimawh em em a ni, a ti bawk.

December thlaa Mega Mockdrill Excercise neih tur hi National Disaster Management Authority in India ram chhung hmun hrang hranga Mockdrill neih tur Calendar a siam lawk hnuaia kalpui tur a ni a, Serchhip ah hian Earthquake Drill neih tura ruahmanna siam niin Magnitude 7 velin khawpui a sawi avanga khawpuiin harsatna a tawh theih tur hrang hrang te a tak ang thei ber tura chan lawkna a ni dawn a ni.

He mi atana mi hrang hrang leh Department hrang hrang te mawhphurhna tur vawiin hian thlir ho a ni a, a tul ang zela hmalak dan turte pawh sawi ho nghal a ni.

Vawiina meeting ah hian DDMA member te bakah sawm bik Department pahnih I&PR Department leh PHE Department te an tel a, Aizawl atangin  Pu Zothansang Hmar, Aizawl District Organiser, leh Pi Zoenmawii, State Disaster Management Co-ordinator ten an rawn tel pui bawk a ni.

Tun tuma Meeting hi he Mega Mock Exercise atana meeting tum khatna a ni a, a tul angin meeting hi neih chhoh zel tur a ni.