Lok Sabha leh 28-Hrangturzo Assembly bial Bye-Election atana Election Commission of India in Serchhip District leh Champhai District atana General Observer-a a ruat Saleem Mohammad IAS chuan Inrinni March 22, 2014 khan Serchhip a rawn thleng a, hemi ni vek hian Hrangturzo bye-election atana Returning Officer leh Serchhip District Bawrhsap ni bawk Dr. Franklin Laltinkhuma leh Election buaipuitu officials ten a pisa-ah an lo dawng sawng a ni.

Observer chuan official-te inbuatsaihna chu tha tawka a hriat thu leh inthlanna felfai leh muanawm tak neih leh theih ngei a beisei thu a sawi a, hemi atan hian official te chu thahnemngai taka thawhpuiah a sawm a, inthlan kaihhnawiha buaina leh harsatna emaw, zawhna leh hriatchian duh nei tan 8974641210/09419142817-ah nitin, office hun chhungin a biak pawh theih reng a ni.

Pu Saleem Mohammad hi IAS officer niin Jammu and Kashmir state sawrkar hnuaia Rural Sanitation Director hna chelh lai a ni a, Serchhip leh Champhai district vil kawp tura ruat a nih angin heng bialte hi a kartawn thin dawn a, amaherawh chu a hun tam zawk Serchhip-ah hmangin, inthlan zawhfel hun thlengin a awmchilh dawn a ni.