District Agriculture Officer, Serchhip District hmalakna in vawiin chhun khan Serchhip DC’s Conference Hall-ah Serchhip District a NLUP Oil Palm Trade thlangtute tan training buatsaih a ni a, District Bawrhsap Pu P.Lalchhuanga, MCS chuan khuallian niin he training hi a hawng a ni.

Training hawn inkhawm tawite neih ah District Bawrhsap chuan beneficiaries kalkhawmte chu mitlemte thlanchhuah zinga an tel avanga an vanneihzia inhre tura chahin, tanpuina dawng tura thlan an nih chiah atang khan mawhphurhna pawimawh tak an nei theuh ani a ti a, taima taka thawka midangte tihhmuhtu ni turin a chah a ni. Bawrhsap chuan NLUP hmasa zawk sem anih laia a tawnhriatte sawilangin khatih laia thawk tha duh leh thawk tha duhlo te dinhmun inthlauh tawhzia a sawilanga, inchhir fe fe an tam a ni tiin beneficiaries te chu tunah bul an tan chauh a, fimkhur hun lai tak anih thu sawilangin taima taka hlawhtlin tum tlat tan chuan hlawhtlin pui tham sawrkarin tanpuina leh zirtirna a pe ani a ti bawk.

Bawrhsap chuan Oil Palm chingtute vanneih bikzia sawiin sawrkarin hralhna tur rate a siam sa vek a, a hralhna tur angaihtuah sa vek bawk a, kawng sialsak vek an nih avangin an hlep tur zat hre lawk sa in hna an thawk ani tiin khawlin a chawm zawh tawk tur thar chhuak ngei ngei turin beneficiaries te chu a fuih a, hlawhtling tur chuan rinawmna a pawimawhzia thu sawi langin beneficiaries te chu an pawisa dawn te NLUP atan chauha hmang turin a ngen a, Sawrkarin pawisa fai a pek chhuah hunah pawh savings bank account a dah a, mamawh dan ang zela pawisa lachhuak thin turin a chah bawk a ni.

Training hawnna inkhawm kaihruaitu Pu Lalthansiama, DAO pawhin NLUP 2^nd  instalment chu sem tura peihfel tep anih tawh thu sawiin, a sem dan tur mumal taka ruahman anih thu a sawi a, Oil Palm chingtute chu mithiamte thurawn zawm hram hram tura chahin, enkawl uluk lamah taimak chhuah lehzual a ngaih thu a sawi bawk.

NLUP beneficiaries-te hi Pu Lalremngheta, Food Fats  & Fertilizers Ltd. Chuan training pe in, Oil Palm ching hlawhtling tura tih ngai zawng zawngte leh a hralchhuah dan tur thlengin projector hmanga a lem nen entirin  zirtirna hi a pe a ni.

Training zawh hnu hian Pu K.Laltlanmawia, AEO kaihhruainain NLUP 2nd instalment sem dan tur leh hmalak chhunzawm dan tur beneficiaries te leh Department aiawhten an sawi ho a, NLUP Oil Palm 2^nd instalment ah hian mi pakhat tan Rs. 40,000/- theuh ruahman sak an ni a, heta tang hian Oil Palm khur laih nan leh a bul vel laihzawl nan Rs. 8000/- ruahman a ni a, Oil palm chin hlawhtlin anih hma a a chingtuten sum hnar dang an lo neih theihna atana bul tanna tur Rs. 5000/- dah a ni bawk a,  Oil Palm a puitlin tak tak hma a, a kung inkara thlai dang lo chin lailawk (intercropping)na turin Rs. 10,000/- ruahman a ni bawk a, Oil Palm chinna hmun thlawhfaina leh oil palm tiak an huana an phurh thlenna atana sen so turin Rs. 7000/- ruahman a ni bawk a, leitha (fertilizers, weedicides etc.) lei nan Rs. 10,000/- ruahman sak an ni bawk.

Fertilizers(Urea, DAP,MOP), BAVISTIN(Oil Palm te natna laka veng tu damdawi), Furadon G(oil palm eichhetu rannung laka vengtu), GLYCEL(weedicides) te hi beneficiaries te tan Aizawla lei a buaithlak avangin Department in a leisak dawn a, heng zawng zawng leina tur Rs. 5078/- leh Aizawl atanga beneficiaries te thlai chinna hmun thlen puina tur (transportation) sen so Rs. 700/-, avaiin Rs. 5778/- chu an pawisa dawn tur atanga cut sak an ni ang a, tangka fai 2nd instalment atanga beneficiaries te kuta lut tur chu Rs. 34,222/-ani dawn a ni.

Serchhip District ah hian Agriculture Department hnuaiah beneficiaries 582 awmin an zinga 293 in WRC-I (Leilet) an thlang a, 169 in WRC-II (Terrace) an thlang a, 46 in Sugarcane (Fu) thlangin 74 in Oil Palm an thlang a ni.

Serchhip-ah hian Oil Palm tharchhuah te process na tur khawl lian Rs. Nuaih 250 man bun tura ruahman mek a ni a, kumin kum tawp lamah chuan bun fel theih beisei anih thu DAO Pu Lalthansiama’n a sawi a, Serchhip District ah hian Oil palm hnuaiah ram hectare 800 vel cover a ni a, khawl hian hectare 1200 vel chawm zo tura beisei a ni.