Vawiin hian Serchhip District Co-ordination Committee on FOCUS te chu an Chairman Pi Sangchhin Chinzah hovin a pisaah an thukhawm a, hmalak tawh chinte thlir hovin hmachhawp awm te an zir ho.

Pu C. Lalnithanga, Serchhip District Project Manager leh DAO ni bawk chuan FOCUS hnuaia Serchhip District a hmalak tawhna report pein tun April – June, 2019 chhung hian Project Management and knowledges Service hnuaiah orientation, meeting, briefing & training chi hrang tum sarih neih tawh a ni a, Baseline Survey neih tawh niin, khaw 42 ah village Level Consultation Meeting neih tawh a ni a. Lead Farmer tur khaw 42 ah vek thlan tawh niin, Farmer Interest Group 157 din an ni tawh bawk a, Jhum improvement hmalaknain Hactare 740 ah Arhar Dal chin tir mek an ni a, M. Orange pawh chhungkaw 1167 te hnenah chin tir hna thawh mek a ni. Heng loneitute tan hian training chi hrang hrang neih thin a ni bawk. Land Resource, Soil & Water Conservation hmalakna lamah khaw 35 ah Community Conservation Area enfiah tawh a ni. Tin, thawktute tana training chi hrang hrang a remchan dan anga buatsaih chhoh zel a ni bawk.

Vawiina committee hian AH & Vety   hnuaia hmalakna tur kumin atana ruahmanna thenkhat te an enpuiin a pawmpui nghal a, chung zingah chuan Vawk Note tihpun nana Vawkpui pasarih theuh vulh tura thlan chhungkaw 10 te chungchang pawmpui a ni a. Heng chhungkaw 10 te hi an mamawh tur sum leh hmanrua tanpuina 50% FOCUS atangin pek an ni dawn a ni. Tin, hetiang bawk hian district chhung khaw panga; Hmawngkawn, Lungkawlh, Khawbel, Leng leh Sailulak te a Sial vulh kalpuina tur leh an mamawh hrang hrang te ruahmanna chu a pawmpui bawk a. Sial In sak sakna tur te, an tuiinna tur siam sak te, an tlatna tur ram hung sakte chu a langsar te niin anni pawh hi FOCUS atangin 50% puihna pek tur an ni dawn a ni.

Heng te bakah hian FOCUS hnuaia hmalakna tur pawimawh dangte pawh sawiho nghal a ni bawk.

He hunah hian Line Department hrang hrang AH & Vety, Horticulture, Land Resource, Soil & Water Conservation leh Agriculture atangte in mi pawimawh te an tel a ni.