Vawiin hian Serchhip District Executive Committtee on Khelo India te chu an Chairman leh Bawrhsap ni bawk Dr. Lalrozama, IAS pisaah an thukhawm a, tun thla 24th – 25th November, 2016 a Sport Discipline chi sawm hmanga District Level Competition neih dan tur an rel.

Chairman, Dr. Lalrozama chuan, Pathianin mitinte hi theihna hrang hrang min pe a, a then chu infiamna lama theihna chungchuang bik nei, ram leh khawvel huap pawha hmingthan pui theite pawh an awm thin. Serchhip District atang ngei pawhin infiamna lama thleng sang tak tak kan lo nei tawh thin a, kan la nei chho zel pawhin ka beisei. Chung infiamna lama theihna neite zawn chhuah chu he Khelo India in a thil tum pawimawh ber a nih avangin, Serchhip District-a naupang talent nei thate kan haichhuah ngei theih nan theihtawp kan chhuah a tul a ni, a ti a. District chhunga naupangte chu an zirna thlah dah chuang hauh lova an hriselna atan leh an talent zawn chhuahna pakhat atan an tui zawng infiamna lo practice thin turin a chah bawk.

Khelo India hi Government of India, Ministry of Youth & Sports Affairs hnuaia Flagship Programme a ni a. India khua leh tui kum 17 hnuai lam (as on December 31, 2016) te tana infiamna ki hrang hrang heng; Badminton, Table Tennis, Hockey, Football, Athletics, Boxing, Judo, Taekwondo, Wrestling leh Weightlifting ah te District Level intihsiakna buatsaih a, State Level-a neih leh tura ruahmanna a ni. India rama naupang infiamna lama talent nei thate haichhuahna leh an kalzui zel dan tur ruahmanna Programme pawimawh tak a ni. Mizoram State ah chuan State Sports Council in a kengkawh a, an ni ruahmanna in tun November 24th – 25th hian District level ah neih a ni anga, December 1st-2nd ah State Level neih chhunzawm tur a ni ang. Tin, infiamna ki (discipline) hrang hrangte khi mipa leh hmeichhe category ah then vek a ni a, a tel turte chu an birth certificate nena kal tura phut an ni bawk.

Vawiina District Executive thukhawmte chuan, a hun hi a tepter deuh hlek tawh avangin a buaipuitu tur Organising Committee dina, annin a chak thei ang berin hma la chhunzawm se tiin a rel a. Organising Committee, Addl DC Pu. K. Lalrohlua, MCS Chairmanna hnuaia din nghal niin District Sports Associations hruaitute leh District Level a Sports Discipline hrang hrang hotute chu member niin IPRO te, BDO te leh Official pawimawh dang engemawzatin an telpui bawk ang. Tin, Organizing Committee hian District chhunga infiammi naupang, Khelo India District Competition a tel turte, khawtina Games & Sport Association emaw khawtlang hotute berawn chungin a ngaihtuah nghal dawn a ni.