Vawiin chawhma dar 11 khan Serchhip District-Level NLUP Monitoring Committee thutkhawm hmasa ber chu an Chairman Pu K.Lianzuala,MLA   kaihhruainain DC\'s Meeting Room-ah neih a ni.

Pu K.Lianzuala chuan committee memberte chu NLUP Programme pawimawhna hre thar leh tura chahin, Policy zahawm tak mizo hnam dinchhuahna atana ke pawimawh tak anih avangin Chief Minister leh Sawrkar in a ngaipawimawh em em a, Mizoram mipui za a sawmriat (80%) kuthnathawktute hian leirem an rah theih nan mi zawng zawngin a hlawhtlin theih nan a theihtawp chhuah a ngaih thu sawiin, NLUP chungchanga hmalakna reng reng chu a langtlang tur ani a ti bawk.

District-Level NLUP Monitoring Committee Co-Chairman, District bawrhsap ni bawk Pu P.Lalchhuanga pawhin Monitoring Committee member te pawimawh zia sawiin monitoring hi project reng reng innghahna, a hlawhtlinna atana ki pawimawh tak anih avangin uluk taka thawh a tul tih a sawi a, Serchhip District a hman tur monitoring form a buatsaih chu a sawifiah nghal bawk a ni.

Vawiina Committee hian thla thum danah hmalaknate thlirhova thutkhawm ziah a rel a, NLUP First Instalment dawng te hmalak dan Line department hrang hrang  ten an zirchianna report an thlir hova, a titha leh tithalote chunga hma lak chhunzawm dan turte pawh an sawi hova, Village-Level NLUP Monitoring Committee Member list ennawn chungchangte leh Village-Level NLUP Monitoring Committee Member ten hna tha taka an thawh theih nan a tanpuina pek dan tur te ngaihtuah a ni bawk.