Vawiin chawhma dar 11:00 khan Serchhip DC Meeting Room-ah District-Level Standing Committee on Election chu a vawikhatna atan an chairman District Bawrhsap, District Election Officer ni bawk hovin an thukhawm a, February ni 23 a Village Council inthlan lo awm tur atana pawimawh thil chi hrang hrang an rel a ni.

District Election Officer chuan inthlan (election) hi Election Commission leh Sawrkar ngaihpawimawh em em a nih avangin a hlawhtlin nan theihtawp chhuah a tul a, mawhphurhna hlen chhuaklo tan chhuanlam siam mai mai a rem dawn lo a ni a ti a, Village Council Election hi a bulthum (grassroot level) a Democratic process kalpuina anih avangin ngaihthah chi a nil ova, a tihhlawhtlin hi kan bat a ni a ti bawk.

Vawiin thurel zingah chuan - Model Code of Conduct khauh taka kenkawh anih theih nan Monitoring Team din a ni a, Pu Lalsangliana Serchhip Additional D.C., Pu Lalrinawma Additional S.P., leh Pu S.T.Lalhmingmawia DLAO te member niin Model Code of Conduct bawhchhiatna leh palzutna lam thil a awm reng rengin an hnenah hian report theih a ni dawn a ni. Model code of Conduct kenkawh kawngah MPF te theihtawp chhuaha vil pui tura ngen rel a ni bawk.

Vawiin meeting chuan inthlan boruak muanawm leh felfai zawk awmtheih nana State Election Commission thupek angin political party ten counter hrang hrang siam lovin “Common Counter” hman tlan ni se a ti a, MPF ten counter hi thutchilhin voters te buaipui leh tul dang te keng tlang se tiin a rel bawk. State Election Commission thupek angin MLTP Act khauh taka ken kawh rel a ni a, Police leh Excise Department te bakah YMA te nen tan ho zai rel a ni a, Polling Booth area hi buaina chhuah tamna hmun anih thin avangin Police leh Excise te duty uluk zual tura tih a ni a, Polling Booth tinah Police pakhat tal duty tir bakah a tul dana zirin pahnih leh a aia tam pawh duty tir dan ngaihtuah nise an ti a, sensitive area ni a an hriat deuhah chuan prison van nen duty ni se tih a ni bawk.

Mipuite zangkhai theih nan Polling Station panna kawng mimal taka sial vek tur a tih anih bakah inthlanni hian tui leh eng (electricity) khaihlak a awmloh nan ruahmanna tha tak siam a ni bawk.

Vawiin meeting thukhawm chuan Serchhip Sub-Headquarters YMA in Village Council Election muanawm tak neih a nih theih na atana hma la a political party hrang hrang te kawmna a nei chu lawmawm an tih thu an tarlang bawk.

Pu ST Lalhmingmawia DLAO, Assistant District Election Officer leh Committee Secretary ni bawk chuan Serchhip District chhunga MLA Constituency pathum atangin VC 44 thlan a ni dawn ani tih a sawi a, VC Seat 192 awmin Polling Booth 62 siam a ni dawn a ni. VC seat hi VC tina In (household) awmzat atanga chhut ani tih sawiin in 200 aia tlem khua 23 a awm a, hengah hian VC seat 3 inchuh a ni ang a, in 201 atanga in 500 inkar khua 12 ah VC seat 5 theuh an inchuh ang a, in 501 atanga in 1000 awmna khua 9 ah VC seat 7 theuh an inchuh thung ang. VC seat 9 awm theihna In 1000 aia tam khua Serchhip district ah hian a awmlo a ni.

VC inthlan atan niah Polling Station 44 awmin heng zinga 11 chu Serchhip Constituency a awm a ni a, Tuikum Constituency ah 18 leh Hrangturzo Constituency ah 15 a awm bawk.

Polling Booth hi 62 awmin heng zinga 19 hi Serchhip Constituency, Tuikumah 23, Hrangturzo ah 20 a ni a, Returning Officer 44 zinga 11 chu Serchhip, Tuikumah 18 leh Hrangturzo ah 15 an ni ang.

Presiding Officer leh first polling officer hi 62 ve ve awmin Serchhipah 19 ve ve, Tuikumah 23 ve ve leh Hrangturzo ah 20 ve ve an awm ang a, second and third polling officer hi 116 awmin Serchhipah 37, Tuikumah 43 leh Hrangturzo ah 36 an awm ang. Polling Official zawng zawng hi an vaiin 284 an ni a, Serchhip Constituency ah 86, Tuikum Constituency ah 107 leh Hrangturzo Constituency ah 91 an awm ang.

State Election Commission chuan VC Election Observer atan mi 6 a ruat bawk. Returning Officer te tan hian Serchhip District chhunga hmun 5 ah January ni 25 khan Training pek an ni tawh a, heng hmunah vek hian February ni 17 hian Polling Official zawng zawngte tan training pek leh an ni ang.

Meeting zawh hnu hian DC Office Chamber ah Press Conference koh nghal a ni a, District Election Officer Pu P.Lalchhuanga leh Assistant Election Officer Pu ST Lalhmingmawia ten chanchinbu mite hnenah hian Election chungchang sawifiahin zawhna leh chhanna hun hman nghal a ni bawk.