No.183/2021-2022

Dated Serchhip, the 19th April, 2021: Vawiin hian Serchhip DC Meeting Hall ah Serchhip District Task Force Committee on Covid19 te chu an chairman Pu Kumar Abhishek, IAS hovin an thukhawm a, Covid19 invenna dan sawrkar ruahman hrang hrangte tha taka kalpui a nih theih nana thil tul hrang hrangte an rel.

He hunah hian Pu Kumar Abhishek, IAS chuan, kumina Covid19 thawh hnihna India ram laili lama miten an tawrh mek dan thlirin he hripui hian nasa zawk leh a hma aia hlauhawm zawkin min tuam thei reng niin a lang a. Chutiang dinhmun tha lo tak lak ata kan zaa kan him theih nan, himna dan te tha taka kan zawm a, thuawih taka kan awm theuh a tul hle a ni, a ti a. Covid19 thawh hnihna hlauhawm tak laka kan him theih nan Serchhip District mipuite thawhpuina ka sawm a ni, a ti.

Vawiina District Task Force meeting hian sawrkarin SOP a duan sa chak taka umzui dan tur chi hrang hrang a rel a, amaherawh chu vawiin vek hian State Level Committee an thukhawm nia hriat a nih avangin vawiina SOP awmsa mila hmalak dan tur an sawi hote hi State Level thurel a zira la danglam leh thei a ni thung.

Serchhip khawpui leh Serchhip District chhungah Covid19 laka himna dan hrang hrang, social distancing, Sanitizer, mask, dawr leh pisa, puipunna leh Sport practice hmuna SOP in ti ngei ngei tura min beisei tinrengte khauh leh zuala kalpui ni se tiin an rel a ni.

Vawiin thlenga district chhunga Covid19 vaccine pek tawh dan report ngaihthlak a ni bawk a, kum 60 chunglam first dose la hi 2201 awmin an zinga 688 in second dose an la tawh a, kum 45 chunglamah mi 1920 in first dose la tawhin an zinga 46 in second dose an la leh tawh bawk a, Frontline workers zingah mi 2283 in first dose la tawhin an zinga 1193 ten second dose an la tawh bawk. Health Care Workers 714 in first dose la in an zinga 708 in second dose an la tawh bawk. Second dose hi pek chhoh mek a ni a, vawiinah ngei pawh hmun ngaah Second dose hi pek chhuak a ni.

Vawiina meeting ah hian Pu Lalmuansanga Ralte, MCS, Addl. DC, Pu Stephen Lalrinawma, SP, Pu Amol Srivastava, IAS, SDO Thenzawl leh Pi C. Laltleipuii, SDO Sadaar te, leh District Task Force members te an tel a ni.