Vawiin chawhma dar 11:00 khan Serchhip District Bawrhsap Meeting Room-ah District Level NLUP Implementing Committee leh Monitoring Committee ten Joint meeting an nei a, Serchhip District NLUP Monitoring Committee Chairman Pu K. Lianzuala, MLA Tuikum Bialtuin a kaihruai a, Pu P. Lalchhuanga, District Level NLUP Implementing Committee Chairman leh District Bawrhsp ni bawk pawhin a telpui a ni.

He Joint meetingah hian Line Department hrang hrang te leh monitoring cell ten an hna thawh tawh zat leh thawh dan phung te, an hmasawnna te leh an harsatna te an sawi hova, Village Level Monitoring cell te tan endik dan tur tehna inang siamsa a awm loh avanga an harsatna tawhte pawh an sawi ho. Endik hna thawh dan chungchangah hian pawisa ruahman awm si lova hmun karkik leh ramhnuai pilril tak taka hmalakna zawng zawngte endik vek ngai si chu tun dinhmun a an harsatna lian ber a nih thu an sawi a ni.

He thutkhawmnaah hian Line Department hrang hrangte chuan tanpuina sum chu 2nd Installment atang khan Bank kaltlanga an pek deuh vek tawh thu an sawi a, khaw thenkhat Bank hla lutuk khaw thenkhat te erawh chu a dawngtute tana harsatna siamtu zawk a nih loh nan tangka faia sem mai a nih thu an sawi hlawm a ni.

He committee-ah hian Pu Robert Lalhmangaiha NLUP Nodal Officer, Serchhip District chuan NLUP dawngtu, ram behchhan(Land Base) neih ngai trade thlangtute tan, sawrkarin Revenue Department kaltlangin ‘Ram inpek hawhna dan’(Provisional Pass) siam a tum thu leh a kalphung tur te a sawifiah nghal bawk a ni.

He hunah hian Pu H.L. Chungnunga District Soil & Water Conservation Officer chuan hmunphiah thlangtu Pi Khawvelthangi hlawhtlinna a tarlang a. Pi Khawvelthangi hian tih tak zeta beiin a chi tur pawh hmunphiah hrisel leh hung tha Kolasib ram daih a mi karin, a bul pawh lei huha tuam thlapin a chawlut a, kumin a kumkhatnaah chauh pawh sorkarin a intun nun nana pek a tum zat cheng nuaih khat aia tam thawk chhuak tawhin, hmunphiah man ringawt atanga a kumkhat sum lakluh chu Rs. 1,45,130/- a tling der tawh a ni tiin tih tak zet a beitute chu an hlawhtling tan der tawh a ni a ti bawk.