No.3964/2020-2021   

Dated Serchhip, the 10th August, 2020: Vawiin hian Serchhip DC Meeting Hall ah Serchhip District Level Co-ordination & Monitoring Committee on Pradhan Mantri Van Dhan Yojana (PMVDY) chu an Chairman Pu Kumar Abhishek hovin an thukhawm a, he scheme hnuaia Serchhip District a hmalak dan tur zirchianna leh sawihona an nei.

Chairman Pu Kumar Abhishek chuan, thingtlang mite thiam thil hmanga ramngaw atanga sum chang thei kan hmuhte mumal taka bawhzuina tur scheme hi Serchhip District ah hlawk taka kalpui ngei a tul thu a sawi a. State pawn atanga training thil leh hmanraw chawk luh ngai thil te, tunlai thiamna mila online market-a hralh chhuah dan turah te, branding leh packaging thilah te, a tul ang zela tanpui a inhuam thu a sawi a. Eng thil pawh a hralhna hmun tur thlansa neia siam a ngaih avangin he scheme hnuaia thil siam turte pawh uluk taka zirchian a tha dawn a ni, a ti. A bul tan nan khaw paliah chauh hma kan la la a, hei hi rang taka tihpuna, tihzauh a tul a, kan din tawhte pawhin production an neih thuai theih nan an mamawh hmanruate an neih thuai a tul a   ni, a ti bawk. 

Meeting ah hian Member Secretary Pu K. Lalduhawma, Asst. Registrar, Cooperative Societies chuan PMVDY lo chhuah dan tlangpui sawiin Mizoram state ah chuan Cooperation Department lamin an enkawl tur thute a sawi a, Mizoram bikah he Scheme hi 14th July, 2020 ah Pu C. Lalrinsanga, COoperation Minister in a hawng a, ni 23rd July ah TRIFED nena MoU ziah a nih thu leh item chi 72 ah Minimum Support Price a nih thute, Item hi a dang 31 proposal thehluh mek a nih thute a tarlang a ni.  Chumi hnuah Serchhip District PMVDY Nodal Officer Pu Lalrinmawia'n kimchang takin he scheme thar chungchang sawifiahna hi a nei leh a ni. He hmalakna bul tan nan hian Serchhip ah khaw paliah Vikas Kendra din tawh an ni a, an thil siamchhuah tur nen chung khuate chu: N. Vanlaiphai ah Hmunphiah, Leng ah Khawizu, Serchhip ah Aieng leh Chhuanthar tlangnuamah Aloe Vera te an ni a. Van Dhan Vikas Kendra te hi la tihbelh chhoh zel tur a ni.

PMVDY hi ramngaw hausakna mumal leh hlawk zawka thingtlang mite thiam thil hmanga kalpuina tur ruahmanna a ni a. Hmalakna tur khuaah Self Help Group awmsa te hmanga Van Dhan Vikas Kendra dinin he hmalakna hnuaia thlan bik thil siamchhuah theih an siam chhuak anga, sawrkar laipuiin ram pum huapa Nodal Agency atana a ruat Tribal Cooperative Marketing Development Federation of India Limited (TRIFED) kaltlanga hralh chhuah tura duan a ni. Tun dinhmunah Mizoramah Van Dhan Vikas 44 din nan Central atangin sum Rs. 581.55 Lakh hmuh tawh a ni.