No.1252/2021-2022 

Dated Serchhip, the 5th July, 2021: Vawiin hian Serchhip DC Meeting Hall ah Bawrhsap Pu Kumar Abhishek, IAS hovin ‘Project Thlai leh Thei’ hmalakna kalpui tan dan tur relin Project bul tumtu Serchhip DC Office a officer te leh Horticulture Department aiawhte, Horticulture College & Research Institute, Thenzawl aiawhte, KVK, N. Vanlaiphai aiawhte leh Rural Development Department aiawhte an thukhawm.

Serchhip District chhunga loneitute thlai chin hrang hrang zirchian a, chhinchhiah fela, tih hmasawnna tur ruahmanna, ‘Project Thlai leh Thei’ tia vuah (Research, Documentation and Promotion of Horticulture in Serchhip District) hi Serchhip Bawrhsap Pu Kumar Abhishek, IAS hmalakna in Social Welfare & Tribal Affairs Department kaltlanga Ministry of Tribal Affairs, Government of India a thehluh a ni a, sawrkar laipui hian a pawm sak a.  Serchhip Deputy Commissioner leh Tribal Research Institute Mizoram te chu Nodal & Executing Department niin Horticulture Department, Mizoram, Mizoram University (MZU) Horticulture College & Research Institute, Thenzawl leh expert agency dangte nena thawh ho tura duan a ni a. Project Monitoring Unit leh Project Implementing Unit te neiin hmalak dan tur mumal taka duan fel sa a ni. He project hian district chhunga thlai leh thei lam chi tharchhuah chi hrang hrangte zirchiana, chhinchhiah that sak te, tam zawk leh hlawk zawka tharchhuah a nih theih nana loneitute tanpui leh an tharchhuahte mumal taka thliar fela (process & branding) hlawk zawka hralh chhuak sak dan zawn te a thil tum a ni a. Hmalak bul tan dan turte vawiin hian sawi ho a ni.

Vawiin hian hna hmasa ber, zirchianna (baseline survey) neih dan tur duan a ni a, Serchhip district chu bial liah thenin heng bialah te hian mithiam tirh kual an ni dawn a ni. Survey neih dan tur ruhrel buatsaih dan turte, mithiam (research scholar) hmuh dan turte leh thil pawimawh hmasa hrang hrangte rel ho a ni a, Survey Team hi pahnih siam a ni anga, Processing lam zirchiang tur team pakhat leh a hralhna lam dap tur team pakhat siam a ni dawn a ni. 

He project hi thla 20 chhunga zawh tura duan a ni.

Meeting ah hian Pu Lalmuansanga Ralte, MCS, Addl. DC, Pu Priyank Kishore, IAS, Asst. Commissioner, Aizawl, Pu Malsawmtluanga, PD, DRDA leh project partners aiawh te an tel a ni.