No.149/2019-2020 

Vawiin hian Serchhip District Level Task Force on Covid-19 te chu an Chairman Pu H. Dolianbuaia, MCS hovin DC Meeting Hall ah an thukhawm a, Covid-19 laka invenna hmalakna hrang hrang report  te ngaihthlak niin, rawtna leh dilna hrang hrang te ngaihtuah ho a ni.

An rorel langsar zualte chu:

1.  Serchhip Joint VC leh mimal thenkhat hnen atanga a bik thil avanga hnathawh phalsak (hna kal laklawh thawh chhunzawm) an dilna hrang hrang te sawi ho a ni a. Committee chuan  heng dilna te hi an thawh loh avanga chhiatna nasa zawk (calamity) thlen thei thil a nih chuan, Local Task Force hriatpuina nen District Disaster Management Authority ah dilna thlen se, DDMA in Magistrate te hmanga a enfiah saka, a huna an thawh chhunzawm loh vanga chhiatna nasa zawk thlen thei chi hna a nih ngei bawk chuan hnathawh hi phal sak ni se, a ti a. An thawh chhunzawm dan tur leh thawktu tur zat pawh a tul anga bithliah sak theih a ni ang. 

2.  Feh turte chu dar 8 hmain an chhuak tur a ni ang, tia fehna dan lo duan tawh tuna hman mek chu Joint VC lam ten anmahni area theuh an zirchian hnuah dar 9 ah zawk sawn hlat hlek an rawn dilna pawh District Committee hian rem a tihsak a.

3. Veng hrang hranga dawrte (petty shop) neitute dawr bungruate chu, an awmna Local Task Force ten an bazar sak ang tia rel tawh tuna kalpui mek pawh; Joint VC vek hian a dawr neitute ngei zawk bazar se, tiin rawtna an rawn thlena, hei pawh hi District Committee chuan a pawm sak a ni. 

4. District Supply Chain Management Committee Member Secretary Pu Vanlalhmachhuana, MCS, EO hnen atangin report ngaihthlak a ni a, Horticulture leh Agriculture Department atangin an hmalak dan ngaihthlak a ni bawk a. Zawlpui leh a chhehvel atanga thlai tharte, E. Lungdar Block atanga thar Sawhthing leh Kurtai te, Khumtung atanga thar Balhla leh Zawngtah te,  a theih anga hralhna zawn pui mek zel an ni.

5. Essential Commodity, Serchhip Stock dinhmun hi nitin zirchian reng a ni a, tunah chuan kan dinhmun hi hlauhthawn awmin a awm lo nia ngaih a ni. Petrol leh Gas te pawh thil a kaltluan chuan harsa lo tura ngaih a ni a, petrol leh diesel hi control niin essential services leh district administration lam te chu permit lova pek zel theih tura ruahmanna siam a ni.

6. District Task Force on Transport atangin report ngaithlak a ni a, essential commodity phurtute tana District chhunga Hotel leh Workshop inhawng tura tihte an tlem deuh nia hriat a nih avangin, dawr tam zawkte an inhawn theih nan hmalak a ni a, order hi vawiinah tihchhuah hman beisei a ni. Tin, heng dawr inhawng tura tihte hi a mamawhtuten awlsam taka an hriat theih nan signboard langsar leh felfai tak nei theuh tura hmalak tum a ni.

7.  District chhunga khualzin tangkhang leh hnathawka awm tang laklawh dinhmun report   Pi. C. Lalduhzuali, MCS, SDO Sadar hnen atangin ngaihthlak a ni bawk a, report hi a la rawn luh belh mek zela, committee laia chhinchhiah fel tawh chin chu an vaiin 535 an ni a, a tam zawk hi Construction Company hnuaia hnathawktute an ni. Heng mite hian eitur tlachhama harsatna an tawh loh nan an harsatna te chu an awmna Local Task Force kaltlanga Nodal Officer hnena an dinhmun report zel tura tih an ni. Nodal Officer hi Pu Samuel Zodinsanga, MCS, SDC a ni a, a contact number chu 9862409765 a ni.

8.  Police Department atangin Pu PC. Laltanpuia, MPS, Addl. SP hnen atangin report ngaihthlak a ni a; tunah hian District chhung hmun 28 ah Police 139 te an duty meka, harsatna lian tham engmah vawiin thlengin kan la tawk lo nia hriat a ni. Tin, Supreme Court thupek anga Jail tang thenkhat (first time offenders, etc.,) chhuah tir hna pawh kalpui niin District Jail atangin mi 23 chhuah tawh an ni a, adang 20 chhuah tir leh tura hriattirna dawn leh tawh a ni bawk.   Excise & Narcotics atangin Pu Ngurchhuana, Asst. Commissioner of END chuan Lock down laia an hnathawh dan leh an thil man report an pe a, an mamawh hmanruate a theih anga ngaihtuah zel tura ruahmanna siam a ni.

9. Medical lam atangin report Dr. Lalhlunpuii, District Surveilance Officer, hnen atangin report ngaihthlak a ni bawk a, Home Quarantine te, Facility lama awmte pawh a ni telin an tlem tial tial a, Isolation-a awm te phei chu an vaia discharge tawh an ni.  Meeting report ang chuan Home Quarantine hi 146, Facility a awm mek 23 district chhungah kan nei  a, hei pawhin vawiin la la hian a la tlahniam leh dawn a ni. 

10. Dr. C. Zarzokima, DVO hnen atangin Serchhip District a ran chaw stock dinhmun leh kan nitin mamawh dan ngaihthlak a ni a, district-a ran chaw stock leh lokal mek te chu daihzai taka ran vulhtute hnena sem a nih theih nan AH & Vety Department chuan mawh lo la mai se, a tul angin a hralh chhuahna lam lo enpui se tih a ni.

11. Dr. C. Zarzokima, DVO, hnen atang vek hian Lockdown laia Sailulak khaw Sial, Chinghne rualin an seh tawh chin report ngaihthlak a ni bawk a. Chinghne ho hian Sial Note an seh hlum tawh hi 12 a ni a, hliam 2 an nei bawk a, Sailulak khua hian Sial hi a vaiin 297 an vulh mek a ni. A note man anga chhutin Rs. 2.8 Lakh man hu an seh hlum tawha chhut a ni. District Task Force chuan heng ran hlohtute chhawmdawlna awm thei ang ngaihtuah sak dan zawn ni se a ti a, a venna lam pawh a theih anga thaa kalpui dan dap ni se a ti a ni.

Meeting ah hian member leh sawm bikte an tel tha hle a,   Chairman Pu H. Dolianbuaia, MCS chuan, Deputy Commissioner Charge a lak chhung a tawp dawn hnai tih sawiin, a Chairman na hnuaia hmalakna tinrengah tha taka an thawhpui avangin members te chungah lawmthu a sawi a ni.

Ruahman lawk anga thil a kal chuan naktuk ni 7.4.2020 atang hian Serchhip Bawrhsap Dr. Lalzirmawia Chhangte, IAS chuan a hna hi a rawn zawm leh tawh tura beisei a ni.