No.3403/2019-2020

Vawiin hian Serchhip District Level Task Force on Covid-19 te chu an Chairman Pu H. Dolianbuaia, MCS, District Magistrate hovin DC meeting hall ah an thukhawm a. Hmalak mekna chi hrang hrang te an thlir ho.

He meeting ah hian Pu R. Sathiyasundaram, IPS, SP Serchhip chuan Ministry of Home Affairs leh Government of Mizoram atanga district chhunga tangkhang hnathawktu leh zin vakte tana hmalak dan tur ruahmanna te a sawi a. Hemi chungchanga hmalak tawhna te Pi C. Lalduhzuali, SDO Sadar in report a pe bawk. An ILP atangin Serchhip District-a hnathawk hnam dangte chu zawn chhuah vek an nih tawh a, Company hnuaia thawkte pawh tlawh pawh vekin, an mamawh an lak theih nana permission siam sak an nih tawh thute, chen lailawkna nei lo an awm palha an lo chen lailawk nan Serchhip ah Boxing Hall, Thenzawlah JNV School Hostel leh N. Vanlaiphaiah PWD IB te ruahman a nih thu tarlan a ni. Hnam dang hnathawka awm emaw zin vak, tangkhang te chungchanga harsatna nei chuan thuneitute hnenah a rang lama hriattir thin tur a ni ang.  Incident Commander hi district pum huapin ruat thar an ni a, IPR Press Release dangah tihchhuah a ni ang.

Serchhip district hi thlai tharchhuahna hmunpui pakhat a nih avangin Supply Chain Management Programme enkawltu tur bik Committee din thar a ni a, DC Chairman na hnuaia din Committee hi Pu H. Dolianbuaia, DC chuan vawiin hian Order hmangin a din a ni.

Committee ah hian Food, Civil Supply & Consumers Affairs hnen atang te, Excise & Narcotic Department atang te leh Heath Department atangte in report ngaihthlak a ni a.

Tun dinhmunah Petrol Pump te dinhmun an tha rih a, buhfai, sawrkarin a thlawna a pek chhuah chu retailer hrang hrangah sem mek a ni. Excise & Narcotic Department pawhin ngawrh taka hnathawkin, an hnathawhna lama an mamawh thilte pawh a awm theih ang ang pek tha tih a ni. 

Medical lama mamawh thilte lain tunah hian Aizawlah intirh mek  a ni a,  heng hmanrua te hi district chhung khaw danga sem theih chi a awm chuan a ranglam sem zui ve tur a ni ang. Committee report ang chuan tunah hian Home Quarantine mek 360, Quarantine Facility-a awm mek 49, Isolation Facility a awm mek 3 district ah an awm a. Home quarantine atanga discharge tawh 44 leh Facility atanga discharge tawh 2 an awm a ni.

Serchhip khaw chhung mipuite tana Serchhip Bazar Area (VC-4) ten Bazar dan tur ruahmanna an siam chu ngaihthlak a ni a, tlema tihfel ngai te tihfela siamrem niin hei hi khawpui chhung Local task Force tinte kaltlanga kalpui tur a ni ang. District chhung khaw dang atanga mamawh lei duhte chuan an khaw Task Force te hnenah an mamawh an thlen khawm anga, an Local Task Force in a hlawmin Serchhip ah eng niah pawh an rawn bazar sak thei anga, Bazar Area a an va dawr duh dawr neitute pawh VC 4 Task Force te hian inhawng turin an ngen sak thin dawn a ni. VC Area danga awm a nih chuan a awmna Local Task Force ten hawng turin an ngen sak thin ang. 

Heng te bakah hian thil pawimawh dang engemawzat an rel a ni.