No.5395/2020-2021

Dated Serchhip, the 24th September, 2020: Vawiin hian Serchhip District Water & Sanitation Missions te chu an Chairman Pu Kumar Abhishek, IAS hovin DC Meeting Hall ah an thukhawm a. District chhunga Jal Jeevan Mission hnathawh leh Swachh Bharat Missions hmalakna te an thlir ho.

Meeting ah hian Pu F. Lalsanglura, Sr. EE, PHE Serchhip Division, Member Secretary ni bawk chuan District Water & Sanitation Missions leh a hnuaia hnathawh tlangpuite a sawifiah hnuah Pu PB. Lalnunsanga, SDO, PHED in he Missions kalpui dan chipchiar sawifiahin, Jal Jeevan Missions, Serchhip District a kalpui tawh leh kalpui zel dan tur ruahmanna te sawifiahna a nei leh a ni. Kum 2019-20 chhungin Jal Jeevan Missions (Functional House Tap Connection) hi khaw 19 ah kalpui niin heng zinga khaw pali te hi la zawh fel loh deuh an ni a. Kumin October thla chhunga zawh hman tuma ruahmanna kalpui mek an ni. Heng khaw 19 a hmalak nan hian Rs. 793.75 Lakhs sen an ni. Tin, khaw pasarihah he hmalakna hi thawh ve leh tura ruahmanna siam a ni a; chung khuate chu Rullam, Neihloh, Tuichang, E. Bungtlang, Ngentiang, Hualtu leh Chekawn te an ni a, sum ruahman hi Rs. 1800 Lakhs vel a ni ang. Jal Jeevan Missions hi chhungkaw tinte hnena tui connection pek vekna tura sawrkar laipui ruahmanna a ni.

Pu Samuel Lallawmzuala, District Co-ordinator, Swachh Bharat Missions chuan Swachh Bharat Gramin hmalak tawh dan leh hmabak ruahman te sawifiahna a nei bawk a. Swachh Bharat Missions Gramin hi Serchhip district ah khaw 35 ah kalpui a ni a. Heng khuaah te hian Community Dustbin te, Solid Waste Collection Centre te leh COmmunity Sanitary Complex te sak vek tawh an ni. Swachh Mahotsav 2019 ah Serchhip district chu a titha pathum zinga thlan a ni a, Survekshan Gramin 2019 ah Small state Category ah pahnihna niin tunah hian Prime Minister Award dawng thei tura ram pum huapa thlan chhuah 10 zingah tel mekin endikna hi kalpui chhoh mek zel a ni. World Bank atanga tanpuina (Incentive) hmuh hmangin chhungkaw 1000 hnenah Ekin thawmthatna pek an ni dawn a, Community Sanitary Complex 12 thawm that a ni bawk ang. Committee ah hian kum kal meka Swachh Bharat Gramin hnuaia hmalakna tur ruahmanna te pawh sawi ho niin members ten uluk takin hmalak zel dan tur an rel a ni.

Meeting ah hian Pu Lalmuansanga Ralte, Addl. DC leh members te an tel a ni.