Vawiin lama social networking site hrang hranga Serchhip-a EVM Mock-Poll neih na ah thil diklo awm anga sawi chungchangah Pu Lalsangliana,MCS, Serchhip District Additional DC, Hrangturzo Constituency Returning Officer ni bawk chuan EVM Mock-Poll neih chungchangah thildiklo a awm loh thu a sawi.

Pu Lalsangliana chuan November Ni 15,2013 (Zirtawpni) khan Serchhip DC conference Hall-ah ECIL mithiamte leh Political Party hrang hrang aiawhte nen EVM Mock-Poll neih a ni a ti a, hetah hian Party aiawhte hian inthlanna atana hman tur EVM zinga an duh duh 10, Mock-Poll neih nan hian an thlang chhuak a, enchhinna ah hian vote 1000 zel EVM pakhatah thlak tur a ni a, a tawpa EVM pahnih a vote tla zat chu an chhinchiah dan nen a in an loh avangin party aiawh ten an pawm thei lova, chuvang chuan an sawiho hnu ah inremsiamin a tuk (November 16, 2013) a chhiar nawn leh an rem ti a; a khawl ngai kha khawih chet miah loh a dahin vawiinah thlak that leh a ni a, party aiawhte pawh uluk lehzuala chhinchhiahturin leh vote thlak chhung chuan hmun danga kalsawn tawh lo turin hrilh an ni a, tlailamah Mock-Poll pawh zawhfel niin Party aiawh ten a diklohna an hmu tawh lova, an lungawithu lehkha a ziakin an dah a ni, EVM te hi uluk taka seal niin Strong Room-ah kalhhnan a ni a, Police ten chhun leh zan zawmin an veng nghal a, inthlan dawn ah chauh polling party ten an keng chhuak ang. Pu Lalsangliana chuan mihring inthlahdah vang leh fimkhur tawk loh vanga thil buai ta anih thu a sawi bawk.

Hetih rual hian District Election Officer Pi Juhi Mukherjee, IAS pawhin inthlan felfai leh thianghlim a awmtheih nan langtlang takin inbuatsaih a nih thu leh EVM mock-Poll pawh hi ECIL Engineer te leh Election Observer te hriatpuiin  Video in a vaia record dah that vek anih thu a sawi a, thu belhchian dawllo, inthlan boruak tichhe thei, finfiahna awm bawk silo reng reng thehdarh lo turin mipuite a ngen thu leh, hriatfiah duh leh hriatchian duh nei tan Serchhip District Election Office in complain na tur number 03838-226099 a neih thu leh englai pawha an vil reng thu a sawi a, thu diklo mipui ti chi ai thei vawrh darh leh anih chuan dan angin hma lak zel anih dawn thu a sawi bawk.

District Election Officer hian a tidiklo palh tu te party candidate pawh a biak thu leh thil awmzia a hrilhfiah thu te, an hriatthiam tawh thu an lo hrilh let thu te a sawi bawk a ni.

Vawiin tlaia EVM Mock-Poll neih zawh anih veleh khan political party aiawhte pawhin thuthar lakhawmtu ten telephone a an zawhna chhangin thil awmdan an sawifiah a, mihring fimkhur tawk loh vanga hriatfuh loh palh anih thu an sawi a ni.