1292/2024-2025

Dated Serchhip, the 24^th July, 2024: Serchhip III (Chhim Veng) leh New Serchhip North Village Council-a seat ruak pakhat ve ve, General Seat hnawhkhahna tura bye-election neih tur inbuatsaihna atan vawiin khan VC Draft Roll chu tarchhuah niin hming thun thar, paih leh siamthat ngai te tan ni 25.7.2024 atanga ni 31.7. 2024 thlengin dilna thehluh theih a ni ang.

Village Council Draft Roll hi Pu Paul L Khuma, DC leh DEO chuan vawiin khan Serchhip DC Meeting Hall-ah tlangzarhin, Serchhip III (Chhim Veng) leh New Serchhip North Village Council tana Draft Electoral Roll dinhmun tlangpui a sawi a. Serchhip III (Chhim Veng) ah Vote nei mipa 422 leh hmeichhia 432, an vaiin Vote nei mi 854 an awm thu a sawi a; New Serchhip North Village Council ah Vote nei mipa 778 leh hmeichhia 835, an vaiin Vote nei mi 1613 an awm thu a sawi bawk. Electoral Roll ennawnna neih tura mawhphurhna hrang hrang neite chu theihtawp chhuah turin DC Pu Paul L.Khuma chuan a chah a ni. 

Draft Electoral Roll hi Electoral Registration Officer (ERO) 26-Serchhip (ST) AC, Assistant Electoral Registration Officer (AERO) 26-Serchhip (ST) AC leh Village Level Officer (VLO) te leh DC Office (Election Branch) ah te en theih a ni. 

He hunah hian Pu Gaston Vanlalhriatpuia, Election Officer chuan kumin July 1-a kum 18 tling chin te tan hming thun belh theih a nih dawn bakah hming paih leh siamthat ngai te tan Form 3, 4 leh 5 hmanga dil tur a nih thu a sawi a. Dilna hi Serchhip III (Chhim Veng) leh New Serchhip North VLO hnen atangin lakchhuah theih a ni ang a, ni 25.7.2024 atanga ni 31.7.2024 thleng dilna thehluh theih a nih thu leh heng dilna te hi ni 1.8.2024 atanga ni 8.8.2024 chhunga chingfelin ni 13.8.2024-ah Final Electoral Roll tarchhuah a nih dawn tih a sawi a ni.

Vawiin a Draft Electoral Roll tarchhuah tak hi DEO chuan Political Party leh ERO bakah VLO te hnenah a copy pein mipuite tan en theih a ni dawn a ni.