Mizoram State Tobacco Control Society (MSTCS) buatsaihin vawiin chawhnu khan Serchhip Chief Medical Officer's Conference Hall ah Serchhip khawchhunga pawl hrang hrang aiawhte hnenah  vaihlo chungchang inhrilhhriatna "Sensitization Workshop on Tobacco for  Different Target Groups" neih a ni a, Dr. Malsawma, Chief Medical Officer, Serchhip District leh Vanlalzari, District Coordinator, MSTCS, Serchhip ten pawl hrang hrang aiawhte hi vaihlo leh dan in vaihlo a khap dan chungchanga hriattur pawimawh zualte an hrilhfiah a ni.

Dr. Malsawma, Serchhip CMO, District Anti-Tobacco Squad Member Secretary ni bawk chuan vaihlo  thatlohzia leh mihringa nghawng a neih nasat zia a lem nen (powerpoint) a entir  a, zuk leh hmuam hi a thalo ani tih hre reng chung si a kan tlansan theilo thin hi pawi a tih thu sawiin, vaihlo in mihring taksa a tihchhiat nasat dan leh a hlauhawmzia inzirtir bakah vaihlo leh a kaihhnawih laka fihlim a hlawkzia leh nawmziate pawh inzirtir uar deuh deuh a tul ni a a hriat thu a sawi lang bawk.

Vanlalzari, District Coordinator pawhin vaihlo leh a kaihhnawih thila  Sawrkar Laipui dan dinglai "COTPA, 2003" chungchang powerpoint hmangin zirtirna a pe a, puipunna hmuna vaihlo zial zuk khap anih thu te, Zirna In hnaih a vaihlo leh a kaihhnawih thil zawrh khap anih thu te, kum tlinglo hnena vaihlo leh a kaihhnawih thil hralh  khap anih thute, Dawrkai te tih tur  atana Sawrkar dan siam te leh heng dan bawhchhe hremna tur te pawh hi a sawi lang bawk a ni.

Powerpoint presentation zawh anih hnu hian sawihona hun hman a ni a, vaihlo dona kawnga tan lak ho dan tur te leh hmalak zui zel dan turte an sawiho nghal a ni.

Vawiin inkhawm hi Pi Saimawii, President, Serchhip MHIP-in a kaihhruaia, Kohhran hruaitu, V/C, YMA, MHIP, MUP, MZP, Taxi Driver, Auto Rickshaw Driver te leh pawl  hrang hrang aiawhte an tel kim hle a ni.