Vawiin chawhnu dar 1:00pm khan Serchhip DC Meeting Room-ah Serchhip Bawrhsap mawhphurhna la mektu Pu VL Remliana, Addl DC hovin tun hnaia Serchhip chhehvel ram nasa taka kang chungchang ngaihtuahin Meeting pawimawh tak neih ni a, ram kang tuartu te bakah, Serchhip khaw chhunga Village Council hrang hrang hruaitute leh Sub- Hqtrs YMA hruaitute bakah DM&R Department aiawh te an tel a ni.

Pu VL Remliana chuan kangmei tichhuaktu chu zawn chhuah ngei a pawimawh thu leh YMA in FIR an thehluh chu bawhzui ngei a tul thu a sawi a, mahni ram theuh venghim tur leh uluk taka enfiah thin turin kalkhawmte a chah bawk. Ram chu a chhia emaw a tha emaw kan zavaia venhim hi kan mawhphurhna a nih thu uar takin a sawi a. Ram tikangtute lakah hremna lekkawh ngei anih tur thu a sawi bawk.

Sub-Hqtrs YMA Serchhip President Pu RL Chhuanawma pawhin kar khat chuang tha thlah lova kang thelh tura Serchhip khaw chhunga YMA branch hrang hrang atangin YMA member thahnem tak kang thelh tura an chhuah thin thu a sawi a. Mi tlawngngai tam tak an la awm chu thlamuan thlak a tih thu leh lawmawm a tih thu a sawiin, thing ro tam lutuk chu ram kang ti nasa zualtu nia a hriat thu leh hemi enfiah kawnga chak zawka hmalak a tul thu a sawi a. Ram kan chhan chu suahsual vang hrim hrim aiin fimkhur loh vang ni a hriat thu a sawi bawk.

Kangmei tuar kalkhawmte pawhin an ram leh thlai kang zat leh harsatna an tawhte an sawi a, hemi hnu hian sawrkar hotute leh YMA leh VC ten tanpuina pek kawnga hmalak dan tur an sawi ho leh a ni.