487/2025-2026 

Dated Serchhip, the 7^th May, 2025: Vawiin khan Serchhip District chhunga sawrkar hnathawk te, tlawmngai pawl hrang hrang hruaitute leh khawtlang hruaituten Artificial Intelligence (AI) hman dan an zirho a.  DC Pisapui Hall-a training buatsaih hi Pu Paul L.Khuma, Serchhip DC chuan a hawng a ni. 

Serchhip DC Pu Paul L.Khuma chuan hriatna leh thiamna pun chak zia leh, chumi mila kan inher rem thiam a ngaihzia a sawi a. Kum reilote chhungin technology-ah khawvel a thang nasa a, a bik takin Artificial Intellligence (AI) bikah hmasawnna a thang chak em em a; chuvangin, AI pawimawhzia hriain Mizoram Sawrkar hotulu ber Pu Lalduhoma hmalaknain training hi a bial Serchhipah buatsaih a ni, a ti. AI hi kan ni tin hnathawhnaa min tanpuitu, ram leh mipui rawngbawl hna sawt zawka kan thawh theihna tur a ni tih hriaa, thahnemngai taka training-a tel turin kalkhawm te a fuih a ni.

Lushai Technologies and Consulting Private Limited (LushAITech) atanga lo kal Pu Lawmna Kima, CEO leh Pu Robert Lalramhluna, Vice President AI/ML ten kalkhawm te an zirtir a. Sawrkar hnaa AI hman tangkai theih dan tur te, zirtirtu leh zirlai ten an zirna pui tura AI an hman tangkai theih dan te, data hrang hrang chak taka lak khawm dan te, Mizo tawng hmanga AI chatbot an siam LushAI-Chat hman tangkai dan tur te leh AI kaihhnawih thil pawimawh hrang hrang an zirtir a. Zawhna leh chhana hun hman a ni bawk. 

Programme hi Additional DC Pu Lalrinzuala’n a kaihruai a, SDO (Sadar) Pi Rebecca Laldinmawii Hrahsel chuan lawmthu sawina hun a hmang a ni.