3970/2023-2024

Dated Serchhip, the 27th February, 2024: Vawiin chawhma khan Serchhip District Wildlife Crime Control Sub-Unit chu an Chairman, Pu M.S Dawngkima, SP, Serchhip hovin a Office Chamber-ah an thukhawm.

He meeting-ah hian Member Secretary Pu Lalbiakchama Chawngthu, DFO Thenzawl chuan report pe in Serchhip District-a District Wildlife Crime Sub-Unit lo indin chhoh dan leh hma an lo lak tawhna te report a pe a. Meetingah hian Serchhip District chhunga dan loa nungcha tihlum thin te leh sumdawnna atana hmangte zawnchhuah a, dan anga hremna pek an nih theih nan action plan duan fel a ni. Nungcha humhalh kawnga mipuite hriat turte zau zawk leh tam zawka inzirtirna- awareness campaign neih nise tiin an rel bawk.

Serchhip District Wildlife Crime Control Sub-Unit member-te chuan 24.2.2024 khan Serchhip Inrinni bazarah sava rep thahnem tak an man a. Heng an sava rep te hi SP Serchhip in vawinah hian a halral nghal a ni. Serchhip khaw chhehvel Mualvawm ramah ramsa leh sava awhna tura thangkam thahnem tak hmuchhuakin an lo man khawm tawh bawk a ni.

Serchhip District Wildlife Crime Control Sub-Unit chuan mipuite hnenah ngenna siamin danlo a nungcha tihlum leh sumdawnna atana hmang thinte chungah dan anga hremna pek an nih tur thu leh, kan ram a nungcha hlu tak tak kan la neih chhunte hlut leh zual a, dan lova nungchate ti hlum lo turin mipuite an ngen thar leh a ni.