2066/2022-2023
Dated Serchhip, the 26th September, 2022: Vawiin khan Serchhip District Hospital thar sakna hmun tura ngaihdan inanglo pawl pahnihte chu Pi Nazuk Kumar, IAS, Bawrhsap hovin DC Meeting Hall ah an thukhawm a, thuchhuah intawm an siam.

Pi Nazuk Kumar chuan, kar hmasa lama an lo inhmuhkawm tawhna bawhzuiin vawiin hian inkohkhawmna an nei leh tih sawiin, PGCIL atanga CSR an hmuh sum leh pai chu pil bo (lapse) palh thei reng a nih thu a sawi a. Damdawiin sakna hmun tur thlan fel vat vat a tul takzet tih a tarlang hmasa a ni. 

Bukpui lama sak duh pawl NGO Coordination Committee aiawhte chuan, damdawiin hi Bukpuiah ngei sak an la duh reng tih sawiin chutihrualin sawrkarin khawiah pawh sa se an lungawi thei tih an sawi a. A hmun ngaia sak duh pawl JAC lam te chuan damdawiin hi a hmun ngaia sak a nih theih nan a theih ang angin hma an la zel dawn tih an tarlang a ni.

Heng pawl pahnihte ngaihdan behchhan hian bawrhsap hriatpuinain thuchhuah intawm an siam a ni.

He hunah hian Pu Lalmuansanga Ralte, Addl. DC, Pi Lalzikpuii, SDO(S), Pu K. Saitluanga, DIPRO leh Pi F. Lalnisai, SDC te an tel bawk a ni.