Vawiin hian Serchhip District Statistical handbook, 2018, District Research Officer, Economics & Statistical Department, Serchhip District ten an buatsaih chu Bawrhsap Pi Sangchhin Chinzah chu DC Conference Hall ah a tlangzarh.

Tlangzarhna thu a sawiah Pi Sangchhin Chinzah chuan, data dik leh information fel fei chu ram hmasawnna tur duanna atana thil pawimawh hmasa a ni a. Mahni dinhmun hre hmasa lovin chhungkua, khawtlang leh ramin hmasawnna tur ruahmanna dik a siam thei lo. Serchhip District in a vawikhat nana Handbook kan nei hi a lawmawmin a ropui ka ti a, DRO leh a thawhpuite thawhrimna ka chhuang hle a ni, a ti.

He hunah hian Pu Lalthangmawia, Inspector of Statistics chuan Handbook buatsaih a nih dan leh handbook chhunga an dah te a tlangpui report a pe a, District bil Handbook hmasa ber a nih thu te, data lakkhawm kawnga mipui, tlawmngaipawl, kohhran leh Department hrang hrang ten an thawhpui that avanga lawmawm a tih thute sawiin, handbook chu phek 82 a chhah, Conversion Table engemawzat keng tela an buatsaih thu a sawi a, a print nan hian bu khatah Rs. 57 zel an sen laiin a mamawh te hnenah chuan Rs. 50 a hralh an rilruk tih a tarlang a ni.

Inkhawm kaihruaitu Pu Manliana, DRO Serchhip chuan Handbook atana data an khawn khawm kawngah kan dil apiangten harsatna siam miah lovin kan dil ang te min pe zel a, hnathawh a nuamin a awlsam a, kan lawm hle a ni, a ti a. Chutihlaiin a vawikhatna ngang a nia, tihsual palh kan la nei nualin a rinawm a, mipuite hriatthiamna dilin, thurawn kan dawng thei reng a ni, a ti bawk.

Serchhip District Statistical handbook, 2018 tlangzarhna inkhawmah hian Serchhip District Officers te, tlawmngaipawl hrang hrang aiawh te, chanchinbumi leh Cable TV aiawh te sawm an ni a. Programme hi Pu V. Laltlansanga, UDC, DRO in lawmthu sawina neiin a khar a ni.