3596/2022-2023 

Dated Serchhip, the 15th February, 2023: Vawiin khan Serchhip Town Sanitation Task Force te chu Pu Lalmuansanga Ralte, Addl. DC hovin DC Meeting Hall ah an thukhawm a. Serchhip khawpui faina lama hmalakna tur chi hrang hrangte an sawi ho.

Chairman Pu Lalmuansanga Ralte chuan, ram a changkang zela mihring pawh kan pung zel bawk a, chu chuan bawlhhlawh a tipung ve zel thin. Serchhip khawpui ngeiah pawh kan bawlhhlawhte a tam tawh em em a buaipui tham tak tak a ni tawh a ni. Hetiang hi kan dinhmun anih avangin chhungkaw tinten bawlhhlawh tlem zawk kan neih theih nana kan theih ang anga hma kan lak a tul tawh hle a, mumal leh felfai taka bawlhhlawh sawngbawl hi kan tan chona pawimawh leh tul tak a ni tih kan pawm a hun hle a ni. Vawiin hian Serchhip khawpuiin hetiang lama a mamawh hrang hrangte kan sawi ho dawn a ni, tiin an ngaihtuah ho turte a tarlang hmasa a ni.

Kal khawmte hian bawlhhlawh thliar hran chungchangah kar khatah tum khat bawlhhlawh tawih thei bik khawn turin bawlhhlawh paih motor tlantir tawh ni se an ti a, tawih theilo lakkhawm ni pawh ni khat dang kalpui a ni se an ti. Village Council ten an huam chhunga chhungkaw tinte chu in lama an bawlhhlawh hmanga leitha an lo siam ve na tur neihtir vek dan pawh sawi a ni a. Home Composting hmalakna hi NREGA hmanga thawh theih a ni a, chu chu hman tangkai theih a nih thu tarlan a ni bawk. Tin, chhungkaw tinte chu Bazar bag tha tak kenga bazar thin tura ngen an ni a, a leitu leh a zuartute pawh Plastic (Polythine) hmang lo tura beisei vek an ni. Hman phal loh Polythine hmang luite pawh chak zawka dapchhuaha hremna pawh uar deuh ni se, an ti. Heng bakah hian Plastic hersawmna khawl DC hmalaknaa CSR hmanga Serchhipin a neih tawh hman tangkai dan turte, bawlhhlawh sawngbawlna hmun thar Chhiahtlang daia buatsaih mek hman tangkai dan turte, ODF Plus ni tura endikna paltlang tura hmalakna turte, veng tina Plastic dahkhawmna tur siam dan turte leh faina lama hmalakna tur thil pawimawh hrang hrangte an rel a ni.

 

He hunah hian Sanitation Task Force Memberte leh Serchhip Town VC tin aiawhte an tel a ni.