No.2617/2020-2020

Dated Serchhip, the 1st July, 2020: Vawiin hian Serchhip khawpui chhunga AOC veng leh Chanmary huamtu Village Council, Serchhip VC-VII te chuan cheng nuai ruk sing khat sangnga zathum sawm sarih leh paruk (Rs. 6,15,376.00) senga Ambulance atana a bika an siam tir Maruti EECO Van thar chu Covid19 do nan leh a tul apianga hman atan Serchhip District Hospital hnenah an hlan.

A hlanna inkhawm tawi hi Chief Medical Officer Conference Hall ah neih niin Rev. H. Lalawmpuia, Serchhip bialtu pastor chuan he Ambulance thar hi Pathian hnena hlanna a nei hmasaa, chumi hnuah VC-VII President Pu H. Lalthianghlima chuan Ambulance chabi chu Dr. Laldawngliana Sailo, CMO leh Dr. ZD Lalmuanawma, District Medical Superintendent te hnenah a hlan a ni.

Thusawitu Pu H. Lalthianghlima, VCP chuan, VC a kan in candidate lai atang tawhin ka thawhpuite nen hian langtlang sawrkar din kan intiam tawh a. Tin, min thlan tlin khan veng chhunga mi harsa zual chhungkaw panga te in sak sak ngei kan tum bawk a. Kan hriat angin Village Council chuan Excluded Fund te, State Finance Commission atang te leh MGNREG Material Component te kan dawng thin a. Heng tanga kan sum dawnte leh mipui thawh khawm awm ang chite hi a nihna turah ren takin tha taka thawk chung siin kan hmang zel a. Kan sum hmanna te hi mipui hriat turin kan tar chhuaka, Gram Sabha ah lehkhain kan sem ziah bawk thin. Fund kan dawn hrang hrang atanga kan hnathawhte pawh thuneitu sang zawk atanga endiktuten an rawn endik vek tawh a, kan lawm khawp mai, a ti a, heng an hnathawhte thlalak hi kalkhawmte hmuh theihin an pholang bawk. Pu H. Lalthianghlima chuan, chung kan hnathawhna atanga kan sum hman bang awm ang ang te chuan kan tum angin mi harsa zawkte in chu kan sa a, mi pahnih in tur kan sa tawh a. Mahse kan hriat angin Covid19 hripuiin mi nuaia, Serchhip District Hospital ngei pawhin hemi dona atan hian Ambulance a mamawh belh hle a ni tih te kan lo hriaa; tichuan kan han ngaihtuah hova kan pawisa la neih ang ang te chu Ambulance atan hman tha kan ti tlang leh ta rih zawk a, kan lei ta a ni, a ti. Maruti Eeco Van hi Ambulance atana a siam danglam lehna zawng zawng nen Rs. 6,15,376.00 an sen thu a sawi a. Hetianga thiltih an tum thu hi Health Minister Dr. R. Lalthangliana pawh an hriattir thute a sawi lang bawk a ni.

Dr. ZD Lalmuanawma, DMS pawhin thusawiin, Serchhip Hospital a hman atana Ambulance tha tak mai VC-VII ten an rawn pe chu a lawm thu a sawi a. Hospital in Ambulance chu nei mahse indaih tak tak a harsaa, Covid19 dona thilah rim taka hman a nih reng laiin natna dang tuarte Serchhipa rawn phurh thlen nan te, Serchhip atanga Aizawl phurh thlak nante leh Emergency thil dang tam takah mamawhna a awm reng a. He Ambulance thar pawh hi tangkai takin kan hmang dawn a ni a ti.

A hlanna inkhawm kaihruaitu Dr. Laldawngliana Sailo, CMO pawhin lawmthu sawina neiin hetianga sum tam tak senga mipuite hriselna atana thilpek hlu tak VC-VII ten tih nachang an hria hi a ropui hle a ni, a ti.

He hunah hian VC aiawh te, Media mite, official pawimawh leh sawm bikte an tel a ni.