No.567/2020-2021

Dr. Lalzirmawia Chhangte, IAS, Deputy Commissioner, Serchhip District chuan Serchhip khaw chhunga bungraw phur lirthei luh leh chhuah dan tur chungchangah a hnuai ami ang hian hriattirna a chhuah:

April 22, 2020 chawhma dar 11:00-a Serchhip Town Area huam chhunga Village Level Task Force te Deputy Commissioner, Serchhip hova meeting-in a rel angin, khaw chhunga bungraw phur motor luh chhuah dan tur chungchang chu hetiang hian ruahmana siam a ni:-

1. Essential leh Non-Essential Commodity phur lirthei, Serchhip khawpui chhunga dah tur zawng zawngte chu khawpui chhung lut lovin Kikawnah din phawt tur a ni. Home Department, Govt. of Mizoram atanga phalna nei emaw Vairengte leh Bairabi Duty point-a self declaration-a hming ziakte chauh Serchhip District-ah tlan luh phalsak an ni ang.

2. Khawlaia mipui pungkhawm leh veivak an tam lohna turin bungraw phur hi zanah chauh unload tur a ni a, bungraw phur motor reng reng chhunah khawpui chhung luh phal a ni lo.

3. Serchhip khawpui kaltlanga khaw dang/District danga bungraw dah turte erawh chu phalna nei an nih chuan dang khawtlai lovin tlang tir zel tur a ni a, khawpui chhungah an din khawmuan phal a ni lo.

4. Bungraw chahtu (dawr leh mimal) ten bungraw hlan thlakna tur veng Village Level Task Force-te leh Police duty te hriatpuina chauhin zanah bungrua unload tur a ni.

5. Bungraw phur motor khalhtu leh handyman-te hian bungraw unload an ti tur a ni lova, motor chhuahsan lovin bungraw unload chhung chu an nghak tur a ni.

6. Bungraw unload anih hnuah khawiahmah khawmuang lovin Driver leh Handyman te hi an let leh nghal tur a ni a. Dawr neitu/bungraw chahtute pawhin motor atanga chhuktira lo mikhual phal a ni lo. Khaw chhunga an awm chhungin midang nen inhlat thei ang berin an awm tur a ni.

7. Driver leh Handyman te hi kalkawngah pawh chawl khawmuang lova, eirawng pawh anmahni inbawl mai tura beisei an ni a, mamawh an neih leh puih an tulna apiangah bungraw chahtute leh Village Level Task Force ten lo pui tura beisei an ni.

8. Serchhip District atanga state pawna bungraw laa kalte reng reng (Essential or Non-Essential commodities pawh ni se) Serchhip District an rawn luh leh hunah an chungte bula khawsak a rem tawh dawn lova, sawrkarin a ruatsa quarantine facility ah an khawsa ang a, bungraw laa an kal leh duh anih chuan an kal leh phalsak an ni ang. Tin, an kal hnuhnun ber atang ni 14 chhung chu quarantine facility ah hian an khawsak a ngai bawk ang.