1417/2024-2025

Dated Serchhip, the 2^nd August, 2024: Vawiin chawhma khan District Level Co-ordination Committee on National Deworming Day chu CMO Conference Hall, Serchhipah an thukhawm a. Serchhip District-a National Deworming Day hman dan tur an rel a ni.

National Deworming Day hawnna hun hi August ni 9, 2024 ah neih tur niin vawiin meeting ah hian P&E Veng Anganwadi Centre ah neih ni se, tiin an rel a. Hemi ni ah hian naupang kum 1 atanga kum 19 inkarte chu rulhut hlo (albendazole) ei tir an ni dawn a. Serchhip District chhunga zirna in zawng zawng bakah Anganwadi Centre hrang hrangah ASHA te nena tangkawpin damdawi eitir vek tum an ni a, school kal tawh lo te pawh damdawi hi eitir vek tura ruahman a ni. August, 2024 chhung hian Serchhip District a naupang rulhut damdawi an pek tur zat bituk (target) chu 22,697 an ni.

Sr.CMO Dr LP Malsawma kaihhruaina hnuaiah meeting hi neih a ni a. Serchhip District a National Deworming Day hman tawh thin dan report tarlan niin  National Deworming Day hnunhnung ber February 2024-ah khan an target za zelah 97.7% an tlin a.  February, 2023-ah 96.96%, August 2023-ah 99.35% an tlin a ni. 

National Deworming Day (NDD) hi naupang kum 1 atanga 19 inkarte hnena kum tin vawihnih (2) rampum huapa a ruala rulhut hlo (Albendazole) eitirna hunpui a ni a. India ramah kum 2015 khan State/UT 11 ah bul tan a ni a, a hlawhtlinna hmuh a nih hnuin India ram pumah February 2016 atang khan kumtin hman chhunzawm a lo ni ta a ni. Rulhut pai avanga natna hrang hrang thleng theite dona tur leh, thisen tlakchhamnate leh naupang than thu um bona turin National Deworming Day hi hman thin a ni.