2089/2025-2026

Dated Serchhip, the 11^th September, 2025: Sawrkar laipui Ministry of Tribal Affairs hmalakna kal mek Adi Karmayogi Abhiyaan chungchang vawiin khan Serchhip DC Meeting Hall-ah Serchhip DC Pu Paul L Khuma hovin sawiho a ni a. Serchhip District chhung khaw hrang hranga hmalak dan tur an rel.

Serchhip District aiawh hian District Master Trainer tur mi 5 ten State Process Lab ah telin anni hian vawiin meeting-ah hian training chungchang report an pek bakah Adi Karmayogi Abhiyaan nihphung an sawifiah a, sawrkar laipui duhdante tarlangin hmalak chhunzawm zel dan tur an sawi a ni.

Block Level-a training pe chhawngtu tur Block Level Master Trainer te District Administration chuan a ruat dawn a. Vawiin meeting-ah hian Block Level Master Trainer te tana training  - District Process Lab neih hun tur leh a hmun tur tih fel a ni a. Village level te tana training hun tur pawh ruat nghal a ni bawk.

Adi Karmayogi Abhiyaan-in a tum ber chu Tribal Area bikah sawrkar tha a awm theihna tur leh hmasawnna chak lehzuala a kal theihna tura ruahmanna a ni a. Thingtlang khuaa chengte ngaihtuahna a tha zawnga sawi danglama, hruaitu tha an nih theihna tura zirtir leh kaihhruai a tum a ni. Karmayogi te puihnain kum 2030 ah India ram chu ram changkang a nih theih nan  Tribal Village Action Plan an duang anga. Thingtlang khuaah October 10 ral hmain Adi Sewa Kendra din vek a ni dawn a. He Adi Sewa Kendra ah hian kar hnih dan zelah mipui dawr theih turin sawrkar hnathawkte an thu dawn a ni.