419/2022-2023
Dated Serchhip, the 6th May, 2022: Vawiin khan Pi Nazuk Kumar, IAS, bawrhsap chuan Serchhip bazara sumdawngte nen Plastic atanga thil siam, chawhmeh funna leh thil dang atana kan hman thinte hman tlem dan tur sawi hona hun an hmang.

Bawrhsap chuan thusawiin Mizoram sawrkar in polythene pan tak hman hi a khap tawh a, ei tur, nepnawi leh bazar chawhmeh funna atan tea kan hman thinte hi khap tura tih a ni. Plastic atanga siam thilte hi tawih thei lo a nih avangin bawlhhlawh sawngbawlna hmunahte pawh a tam ber a ni zel a, buaipui a ngai tak zet a ni. Polythene hmang tlem tura hmalaknaah hian Bazara chawhmeh zuartute in pawimawh em em a, a bul tantu leh mite zirtirtu in nih a tul a, a theih chin chinah a hman tlem dan tur lo ngaihtuah tan turin ka sawm che u a ni, a ti a. Tun thla atang hian hman tlem dan tur zirin tan kan la anga, thla thar atang chuan paper bag chauh hmang tura hmalak a ni tawh ang tiin sawrkar hmachhawp a tarlang a ni. Dan hmanga khap beh ai chuan mitinin polythene hman tlem duhna thinlung nei vek zawk ila, kan ramin a hlawkpui hle dawn a, mipuite zirtirna pawh nasa taka kalpui kan tum dawn a ni, a ti.

Polythene hman tih tlem a nih theih nana hmalak dan turte sawi ho zui a ni a. Bazara sumdawngte hian tun hma pawhin polythene bag hmang tawh lo turin hma an lo la tawh thin a, mahse a dawrtu mipui lam atanga harsatna an tawh thin avanga an tih zui zel theih loh thute Bawrhsap hnenah hian an lo thlen a ni.

He hun hi Pu Lalmuansanga Ralte, Addl. Deputy Commissioner in a kaihruai a, Plastic atanga thil siam vawi khat hmana paih mai tur thil hi hman loh dan a awm em tih ngaihtuah a tul tak zet a. Kan chhehvel thilte hi kan chenna hmun ang tho a kan enkawl a ngai a. Kan tui tlan ber lui tuite ah kan plastic hman hnute a in zam nuaih zel mai a, hengte hi kan tihtawp a hun a ni, tiin plastic tihtlem a tul zia a tarlang a ni.

He hunah hian Pi Lalzikpuii, SDO(S), Pi F. Lalnisai, SDC leh Pi Lalthanghliri Pautu, DUDO Serchhip te an tel a ni.