1903/2025-2026

Dated Serchhip, the 29^th August, 2025: Vawiin khan Tourism Department buatsaihin Serchhip DC Pisapui Hall-ah Capacity Building Programme for Tourist Service Provider in Serchhip hman a ni.

Tourism Department Director Pi R. Lalrodingi  chuan Thenzawl Golf Course chu Ministry of DoNER atanga tanpuina sum hmangin international standard-a siam len tum a ni a, hei bakah hian khualzinte hip thei tur hmun Serchhip district-ah buatsaih tum a nih thu a sawi bawk. Khualzinte innghahna ber Hotel leh Home stay te darkar bi a hman phal a ni lova, sum um luatah dan dik lova kalpui an lo awm tawh thin tih department lamin hriain chak taka an umzui thin thu a sawi.

Tihtakzeta hma la peih tan khualzinte lo dawnsawn leh enkawl hi eizawnna tlak a ni a, sawrkar pawhin theihtawpa tanpui a inhuam thu sawiin tourism sector ah hian tupawh kan pawimawh vek a, theihtawp i chhuah tlang ang u, tiin kalkhawmte a sawm a ni.

He hun hmanpuitu SDO(S) Pi Rebecca Laldinmawii Hrahsel chuan tourism hi sum lakluhna tha tak a lo nih tak avangin ram hrang hrangin an ngaipawimawh em em a. Tourism department pawhin theihtawp chhuahin Serchhip Kawlri tlangah pawh heritage site changtlung tak a buatsaih mek thu a sawi a. Tourism hi thil ho te anga lang, hnam dang laka kan hmel lanna pawimawh tak ni si a ni a, hun lo kal zel tur thlir chungin faina leh thianghlimna kawngah te pawh nasa zawka tan lak a tul thu a sawi. Social Media hman tangkai nachang hriat a that thu a sawi bakah kan ram tan tih theih tangkai tak kan nei theuh a ni tih hre thar theuh turin kalkhawmte a chah bawk a ni.

He hun hi SDC Dr Marilyn Lalruatkimi chuan a kaihruai a. Inspector of Statistics Pi Rosie Liannguri chuan Importance of Statistics tih thupui hmanga thusawiin, Tourist Officer Pi C Ramsangzuali’n Community based tourism & its importance tih thupui hmangin thu a sawi bawk. Serchhipa Khualzin lo dawl thin hrang hrangte leh branch YMA hrang hranga hruaitute an tel a ni.