1506/2024-2025

Dated Serchhip, the 9^th August, 2024: Department of Science & Technology-National Council for Science & Technology Communication (DST-NCSTC) leh Mizoram University bultumin sik leh sa inthlak danglam nasa in khawvel a nghawng dan inzirtirna Serchhip District chhunga High School zirlai te tan ni 5 chhung buatsaih a ni a. August ni 5 ah neih tan niin August ni 9 ah khar a ni a, hemi pual hian Art exhibition neih a ni bawk.

“5-day Workshop on Towards a climate resilient society – Sensitization of climate change to the society through the intervention of visual art in Mizoram, India,” tih thupui hmangin Govt Chhiahtlang High School, Govt Keiṭum High School leh Govt Serchhip High School-ah te nikhat zel hun hman a ni a, MZU, Mizoram State Biodiversity Board leh Govt Serchhip College-a mi thiam ten zirtirna an pe a ni.

Vawiin nilengin HD Rosanga Hall, Govt Serchhip College-ah Art Workshop neih  a ni a, High School zirlai ten Climate change chungchang zirtirna an dawn te Visual Art hmanga phochhuah dan Freelance Artist Francis Lalramdinngheta’n a zirtir a ni. He workshop-a an kutchhuak te leh Govt Serchhip College Art Club member te kutchhuak hi HD Rosanga Hall, Govt Serchhip College-ah a duh apiang tana en theih turin August ni 9, 2024 Zirtawpni khan phochhuah a ni a. He Exhibition-ah hian High School zirlai te kutchhuak 43 leh Govt Serchhip College Art Club te kutchhuak 11 phochhuah a ni. 

He project hnuaiah hian district hrang hrang pali-a High School thlan bikah seminar hi neih tur a ni a, zirtirna pe turin Mizoram chhung leh pawna Science zirna leh Research Centre-a thawkte sawm ṭhin an ni. He project-in a ken tel, Visual Art hmanga sik leh sa danglam zel chungchang phochhuah dan hi Mizoram Academy of Arts, Aizawla zirtirtu ten an zirtir ṭhin thung a ni.