No.7254/2020-2021 

Vawiin hian Serchhip a Covid19 vaccine pek chhuahna tura ruat Centre pahnih atangin Covishield vaccine pek chhuah tan a ni a. Vaccine pek hawnna inkhawm tawi Presbyterian English School Hall ah buatsaih niin Bawrhsap Pu Kumar Abhishek, IAS, Chairman District Health Society ni bawkin a telpui.

Pu Kumar Abhishek chuan, nikum kum tir lam atangin Covid19 hripui vangin kan buai em em a, khawvel hmun tin a hrut chhuak a ni ber a. Chutianga boruak rit tak kan tawrh tawh hnuah vaccine kan nei ta chu a lawmawm hle a, ni chhinchhiah tlak tak a ni, a ti. Hripui laka kan him theih nana hah taka thawktu kan frontline workers ten an dawng hmasa chu a lawmpui thu hrilhin, mipui nawlpuiin vaccine kan dawn theiha, he hrik kan umbo hma chu an inpekna leh thahnemngaihna kan la mamawh reng tih hrilhin, tha thlah lova hripui do kawnga bei zel turin a chah a ni.

Dr. Lalit Dinkar Sarode, Consultant, WHO pawhin he hunah hian thusawiin, covishield vaccine chu tunah India mipui nuai riat velin an dawng tawh a, engmah hlauh tur a awm lo tih a sawi a. Chutihrualin, vaccine kan lak tawh vanga covid19 laka himna dan hrang hrangte namnul mai a thiang chuang lo tih a sawi.

Inkhawm kaihruaitu Dr. Laldawngliana Sailo, CMO pawhin covishield chu, nu naupai mek te, hnute hne lai pawm te leh Allergy (damdawi huat nei) nasa te tan lo chuan a him nia a hriat thu a sawi a. Thisen sang leh zunthlum lam nei te pawhin an la tho va engmah harsatna an neih pui chuang lo niin a lang, a ti.

Inkhawm tawi neih zawh hian Serchhip district a he vaccine la hmasa ber tura thlan    Dr. K. Lallawmzuala, Serchhip DCHC in charge specialist hnenah pek a ni a, chumi hnuah he PES Centre atang leh Midland Middle School Centre atangin vaccine hi pek chhuah zui a ni. A dawng tur hian frontline workers mi za ve ve koh an ni a, naktukah pawh heng centre pahnih atang hian pek chhunzawm leh a ni ang a, Thenzawl CHC Centre ah pek chhuah a ni ve bawk ang.

A thawh khatnaah hian dose 450 pek tur a ni.