395/2022-2023
Dated Serchhip, the 4th May, 2022: Vawiin khan Mizoram Youth Commission hmalakna hnuaia Covid19 hripui avanga state danga thalai hnathawk lokir Serchhip district a mite tana eizawnna peng hrang hrang inzirtirna (Livelihood Generation for returned Migrant Workers due to Covid19) chu Serchhip District Panchayati Resource Centre ah Pu Lalmuansanga Ralte, MCS, Addl. DC in a hawng.

A hawnna inkhawm tawi hi Pi Lalzikpuii, MCS, SDO Sadaar in kaihruaiin, he training hi neih tura ruahmanna rei deuh tawh mah se Covid19 in kan district min chim rei avangin an nei tlai ta hlek tih a sawi a. Hetiang training hi district zawng zawnga neih tura Mizoram sawrkarin a duan a nih thu leh district tinah hian Core Committee pawh din vek a nih thu a tarlang a ni.

Khuallian Pu Lalmuansanga Ralte chuan, thiamna hi theihna min petu, mi tangkaia min siamtu, kan nun tihlutu a ni a, thiamna leh hriatna ngainaa theihtawp chhuaha zawngtute chu reiloteah an thiante zinga mi hlawhtling, puitling hmasaah an lo chhuak mai thin a ni. He training ah pawh hian eizawnna tlak thiau thiam thil chi thum kan inzirtir dawna, a ti mai mai lote tan chuan eizawn zuina tlak a tling ngei ngei dawn. Chuvang chuan a zirtira thlanten i ti mai mai lovang u, tiin training kal tura thlante a chah a ni.

He training Co-ordinator Pi F. Lalnisai chuan hma an lak dan tlangpui sawiin, he training kal duhte zawnna hi chanchinbuah Advertisement chhuahin kan zawnga, amaherawh chu kan beisei zat dilna kan hmu lova. Thalaite tana inzirna tangkai tak a nih si avangin YMA leh MHIP hruaitute phungbawmah sawmin, migrant workers ni chiah lote pawh engemawzat kan tel tir ta a ni, a ti a. Zir tur hi chi thum thlangin, Cement Mistiri, Food Processing leh Piggery te an ni a, Cement Mistiri ah hian seat 40 awmin SIRD & PR mithiamten zirtirna an pe anga, Food Processing ah hian Seat 20 awmin Pi Lalhmangaihzuali, M Sc (Food & Nutrition) leh Pi K. Lalmalsawmi, SMS, KVK ten zirtirna an pe anga, Piggery ah hian seat 20 awmin AH & Vety, Serchhip district mithiamten training an pe thung dawn a ni.

A hawnna inkhawmah hian Er. Lalthlansanga, Core Faculty, Rural Engineering, SIRD & PR leh Pu Kawlthuama, President, Sub- Hqtrs YMA te pawhin thusawina hun an hmang a ni.