December 12, 2012 khan Horticulture Department hnuaia NLUP dawngtu Tuikum Cluster a mite tan Chhingchhip Mualpuia Chhingpuii Hall-ah District Level NLUP Monitoring Committee Chairman leh Bialtu MLA ni bawk Pu K. Lianzuala’n NLUP thawhkhatnaa tanpuina sem tum lina leh a hnuhnung ber tur a sem.

Pu Lianzuala chuan NLUP chu rethei leh rahbi tleute tan dinchhuah theihna tur leh dinchhuahna tham, Mizoramin a neih hmanraw tha ber a ni a, chumi tur chuan Mizoram Sawrkarin theih tawp a chhuah a, a dawngtu mipuite pawhin theihtawp chhuah a tihlawhtlingtu nih ngei an tum a ngai a ni tiin tanpuina dawngtute chu kut kuangkuaha thu mai thei an ni lova, thawhrimna leh tihtakzetna nena an bawhzui ve a ngai a ni a ti.

He hunah hian Lakhuihthei thlangtu chhungkaw 46 te hnenah cheng 31,000/- theuha sem a ni a, Serthlum thlangtu chhungkaw 110 hnenah pawh cheng 5000/- theuha semin grape chin thlangtu chhungkaw pakhat hnenah cheng 37,620/- pek a ni bawk a, a vaia an sum sem chhuah hi cheng 21,18,620/- a ni.

Hemi rual hian Serchhip Cluster-a mite tan Serchhip Hmar Veng YMA Hall-ah sem bawk a ni a, Horticulture Department hnuaia trade hrang hrang thlangtu chhungkaw 160 te hnenah tanpuina hi pein vawiin hian Hrangturzo Cluster-a beneficiaries 520 te tan pawh cheng 41,75920/- sem leh tur a ni.

Agriculture Department, Serchhip District pawhin nimin vek khan an department hnuaia NLUP tanpuina dawngtute tan thawhkhatna sem zovin Monitoring Committee-in dawng chhunzawm tlak lova an ngaih mi parukte hnenah erawh chuan last instalment hi pek ve an ni lo. A

griculture department hnuaia NLUP thawh khatna sem zawh takah hian WRC-I thlangtu ten a vaiin cheng 1,20,000/- an dawng a, WRC – II in cheng 1,36,000/- Oil Palm thlangtu ten cheng 1,20,000/- leh Fu chin thlangtute 1,00,000/- theuh an dawng a ni. Serchhip District-a Agriculture department hian NLUP thawhkhatnaah khan beneficiaries 582 neiin mi paruk an ban leh a, tun tum thawhhnihnaah hi chuan NLUP tanpuina dawngtu chhungkaw 1069 lai an enkawl tawh dawn a ni.