Vawiin chawhma dar 11:00 khan Serchhip Town Area Rate and Wages Control Committee chu an Chairman leh DC ni bawk Pu Lalsangliana hovin DC Meeting Room-ah an thukhawm. He hunah hian Serchhip Sazuar Association ten sa rate tihsan an dilna chu an ngaihtuah ber a ni.

STAR&WCC chuan Serchhip khawtlang leh mipuite dinhmun en chung leh sa rate tihdanglamin a nghawng chhuah tur thil chi hrang hrang; hlawhfa rate te, Arsa leh sangha rate te leh mipui mamawh thil chi hrang hrang man lo pung ve tur te ngaihtuaha thlir chungin tuna rate hman lai hi hman leh rih phawt ni se tiin a rel a ni.

Bawrhsap Pu Sangtea chuan Serchhip Sazuar Association chu Mizoram sawrkara in-register fel thlap an nih avanga an inhung bik theih dan tur te, fel fai leh awmze nei zawka mipui rawng an bawl theihna atana inenkawlna dan fel zawk nei tura hrilhin an harsatnaah tawiawm a inhuam thu a sawi a, an hmalakna reng rengah mipuite hamthatna atana thawktu District Administration thu leh hla ngai chang thin turin a sawm a ni.

Sazuar Association-ten an rawn rawtna ang chuan Bawng sati cheng 220/kg, Bawng thin cheng 250/kg, a ruh cheng 200/kg leh vawk sa cheng 200/kg a ni a, he rate hi mi thenkhat chuan STAR&WCC hriatpui lova an lo hman mek a ni. Hetia committee-in a pawm tak lovah chuan Serchhipah sa zuartu zawng zawngten Bawng sati 200/kg, Bawng thin cheng 220/kg, a ruh cheng 180/kg leh vawk sa hi cheng 180/kg-in an zuar tawh tur a ni.