Vawiin chawhma dar 11:00 khan District Bawrhsap pisaah District Level Committee on RMSA, Serchhip District chu an Chairman Pu Lalsangliana hovin a vawikhatna atan an thukhawm a, RMSA hmanga hnathawh tawhte leh hna kal lai mek chungchangte an thlir ho a ni. He hunah hian Chairman leh District Bawrhsap ni bawk chuan RMSA lo awm chu sawrkar leh mipui tan malsawmna a ni a ti a. Zirna mai bakah sikul building sak that chungchangah leh zirtirtu lak chungchangah te state sawrkar tana harsatna tam tak chhawk zangkhaitu a ni a ti a, tangkai taka hman chunzawm a nih zel theih nan he project-a thawktute leh committee member te chu theihtawp chhuah turin a chah a, tun dinhmuna hma lo lak tawh chin pawh lungawi thlak a tih thu a sawi bawk.

He thutkhawmah hian Committee Secretary, Pu Zolawma DEO chuan RMSA hmanga district chhunga hnathawh hrang hrangte leh hmachhawp te bakah sum hman dan te a tarlang a, Centrally Sponsored Scheme danga Administrative Cost 6% te a nih laia RMSA-a office inenkawlna atana sum dah 1.6% chauh a nih avangin Civil Work te endik leh vil ulukna kawngah harsatna an tawh thin thute a sawi bawk.

He hunah hian NGO lam atanga tel ten RMSA hmanga hna thawh chu khawtlang tana ro tling an nih ngei theih nan, a theih chin chinah a thawktuten vil uluk se, hmanraw tha ngei hmanga hna te thawh a nih theih nan nasa lehzuala tan la turin thawktute an ngen bawk a ni.