2531/2024-2025

Dated Serchhip, the 15^th October, 2024: Vawiin khan Mizoram Down’s Syndrome Association buatsaihin Serchhip Kawnpui VC Hall-ah Awareness Campaign neih a ni a. Pu Paul. L. Khuma, Deputy Commissioner chuan khuallian niin a hmanpui.

Khuallian chuan mihring te chu pianphunga inang tlang vek kan nih lohna hi khawvel tifamkimtu a ni, a ti. March ni 21 chu World Down’s Syndrome Day atan hman thin niin, Down’s Syndrome chungchang inhrilhriatna awareness campaign hun atan an hmang thin a, Down’s Syndrome naupangte kan zahna ni atan te leh khawtlangin enhrang lovin huang khata awm tlang vek kan ni tih lantirna ni atan te hman thin a ni, a ti. “Down’s Syndrome  chungchanga awareness kan neih chuan anmahni enkawl tura chakna kan lo nei anga, a tha zawngin danglamna kan thlen thei dawn a; an dinhmun kan hriat chian hian an harsatna kan hriatthiampui dawn a ni” tiin Awareness Campaign neih tulzia DC chuan a sawi a. An chungchanga awareness kan neihin a thlen chu hriselna kawnga inenkawlna ah te, zirna ah te leh, ei bar zawnna kawngahte Down’s Syndrome naupang te hi a chawisang dawn a ni, a ti bawk. UN in a tarlan danin nau piang 1000 zela 1 hi Down’s Syndrome an ni a, “mi dangte taah kan dah ngawt thei lova, kan ta a ni thei; chuvangin, awareness kan neih theuh a tul a ni”, tiin Down's Syndrome chungchang Pu Paul L.Khuma chuan a sawi a ni.

Nl. Lalhlimpuii Ngente, MDSA Committee Member chuan report a pe a. MDSA hi October 2022 a din tan a ni a, a tum chu Down’s Syndrome avanga harsatna nei ten nunphung pangngai an neih theih nana hmalak te, nu leh pa bangbo tak takte an awm avangin an fate an enkawl thiam theih nana hrilhhriat te a nih thu a sawi. 

MDSA President Pi R Zaihmingthangi chuan Down’s Syndrome hi natna ni lovin nihna a ni a, Chromosome a cell awm tur zat aia tam a lo awm avanga neih a nih thu a sawi a. Nu leh pa in an fate nihna an pawm theih nan an pian hlima inhrilhhriat hi tha an tih thu a sawi. Down Syndrome naupangte hi an rualpuite aiin an hnufum zel thin a, tawngtheilo an ni lova mahse tawng an harsat a, a enkawlnaa pawimawh ber chu an nihna pawm hi a ni tiin, ei leh in, zun leh ek leh mahni inthuam thei tura zirtir hi a pawimawh em em a ni, a ti.

He hun hi Pu ZR Thafala, Fin. Secretary, MDSA in a kaihruai a. Shalom Special School, Serchhip naupangte leh Down’s Syndrome naupangte atangin Special Item neih a ni a. Down’s Syndrome chungchanga zawhna leh chhanna hun hman niin Pu Zodingliana Bawlchhim, Treasurer, MDSA chuan lawmthu sawiin hun a khar a ni.