Road Safety Week hmanna kal zelah vawiin hian Serchhipa Passenger phur lirthei khalhtute tan Training buatsaih ani.

Training hi hun hnihah then niin a hun hmasa zawk hi zing dar 7 ah tan a ni a, hetah hian Maxi Cab Drivers Serchhip atanga zing chhuak zawng zawngte, Autorickshaw Driver, Registration Even Number (Number kawpkim)-a tawp zawng zawngte leh Taxi Driver, Registration Even Number (Number kawpkim)-a tawp zawng zawngte an tel a. He hun hi Pu R. Vanrengpui, SDO (Sadar) chuan  hmanpuiin, Road Safety Week puala mihring phur thin lirthei khalhtu tha hlanchhuahte hnenah lawmman a hlan a ni. Lawmman dawngtute chu-

Autorickshaw – Lalziakkima s/o Lalhula, Chhiahtlang

Taxi – Lalhmunliana s/o Kawlsiama (L), Serchhip Vengchung

Sumo – C. Lalchhanchhuaha s/o C. Zaruala, New Serchhip

A hun hnihna hi hi chawhma dar 11 ah neih leh niin hetah hian Maxi Cab Driver Serchhip atanga chawhnu chhuak zawng, Autorickshaw Driver, Registration Odd Number (Number kawpkimlo)-a tawp zawng te leh Taxi Driver, Registration Odd Number (Number kawpkimlo)-a tawp zawngte an tel ve thung a. Transport Department leh Traffic Police hotuten zirtirna an pe a ni.

Training hawnna hun kaihruaitu Pu B. Lalrinsanga, District Transport Officer, Serchhip chuan lirthei khalhtute chu ruitheih thil laka fihlim tur leh lirthei khalh laia mobile phone hmang lo turin a chah a. Hawihhawm tak, zaidam tak leh dawhthei taka lirthei khalh hi a him ani tih hre thar theuh turin a chah bawk.